Nike $790 mln möçberde zyýan çekdi

Dünýäde sport eşiklerini we aýakgaplaryny iri öndürijileriň biri bolan Nike amerikan kompaniýasy koronawirus pandemiýasy fonunda çärýek boýunça $790 mln möçberde zyýan çekdi. Bu barada kompaniýanyň neşir edilen hasabatynda aýdylýar. Muny regnum.ru habar berýär. 
Resminamadan belli bolşuna görä, kompaniýanyň girdejisi 2020-nji maliýe ýylynyň dördünji çärýegi boýunça (ABŞ-da bu çärýek 31-nji maýda tamamlanýar) $6,3 milliarda barabar boldy. Bu görkeziji geçen ýylyň degişli döwrüne garanda 38% pes. Bu döwürde kompaniýanyň Demirgazyk Amerikada, EMEA sebitlerinde, Okeaniýada we Latyn Amerikada fiziki dükanlarynyň 90%-i koronawirus pandemiýasy sebäpli iki aý işlemedi. 2019-njy ýylyň degişli döwründe kompaniýanyň arassa girdejisi $989 million boldy. Şunuň bilen birwagtda kompaniýa onlaýn režiminde satuwyň 75% ösüşi barada habar berdi. Şeýle-de, Nike administratiw çykdajylaryň 6% we beýleki önümçilik däl çykdajylaryň $3,2 milliarda çenli kemelmegini gazandy. 
Muňa garamazdan, kompaniýanyň arassa girdejisini almak başartmady we onuň ýitgileri hasabat döwri boýunça $790 milliona ýa-da paýnama boýunça $0,51-e barabar boldy. Şeýle netijäni kompaniýa täze koronawirus pandemiýasynyň täsiri bilen düşündirýär. Tutuş maliýe ýylynyň jemi boýunça Nike kompaniýasynyň girdejisi 4%, ýagny $37,4 milliarda çenli pese gaçdy, arassa girdeji $2,5 milliarda barabar boldy, onlaýn satuwlar 47% ýokarlandy. Hut koronawirus pandemiýasy kompaniýanyň onlaýn-söwdasynyň ösmegine güýçli itergi berdi. Şonuň netijesinde kompaniýanyň ýolbaşçylygy 2023-nji ýyla çenli onlaýn-söwdanyň paýyny artdyrmak boýunça maksadyny güýçlendirdi: öň bu paý kompaniýanyň tutuş satuwynyň 30%-i bolar diýlip meýilleşdirilýärdi, indi Nike ony 50%-e çenli ýetirmekçi bolýar.
Häzir Nike alyjylaryň ýuwaş-ýuwaşdan fiziki dükanlara dolanyp başlandygyny belleýär. Eýýäm kompaniýanyň dünýäde söwda nokatlarynyň 90%-i açyldy: tas 100% - Hytaýda, 85% töweregi – Demirgazyk Amerikada, takmynan, 90% - EMEA-da.