Coca-Cola milletparazlyk sebäpli jemgyýetçilik torlarynda mahabatlary ýerleşdirmegi wagtlaýyn togtatdy

Coca-Cola Company milletparazlyk postlarynyň ýerleşdirilmeginde günäkärleme sebäpli Facebook tarapyndan yglan edilen “aragatnaşygy kesme” fonunda jemgyýetçilik torlarynda mahabatlary ýerleşdirmegi wagtlaýyn togtatmak kararyna geldi. Bu barada kompaniýanyň ýerine ýetiriji müdiri Jeýms Kuinsiniň beýannamasynda aýdylýar, muny rbc.ru ýetirýär.
“Dünýäde milletparazlyga ýer ýok, jemgyýetçilik torlarynda hem milletparazlyga ýer ýok. Coca-Cola kompaniýasy jemgyýetçilik torlarynyň ähli meýdançasyndaky tölegli mahabatlary azyndan 30 günlük togtadar” – diýip, Kuinsi aýdýar we şu wagtyň içinde kompaniýanyň mahabat syýasatyny gözden geçirjekdigini sözüniň üstüne goşýar. Ol kompaniýanyň hyzmatdaşlyk edýän jemgyýetçilik torlary tarapyndan giňişleýin hasabat bermä we düşündirişe garaşýandygyny hem aýtdy.
19-njy iýunda “Color of Change”, “ABŞ-nyň antidiffamasion ligasy” (ADL), “Ak jynsdan bolmadyk ilatyň ösüşine ýardam etmegiň milli assosiasiýasy” (NAACP) guramalary we beýleki hukuk goraýjy guramalar iýulda Facebook-da milletparazlyk häsiýetli informasion mazmunyň jemgyýetçilik tory tarapyndan düzgünleşdirilmeýändigi sebäpli garşylyk görkezmek maksady bilen mahabatlary ýerleşdirmegi bes etmäge çagyrdylar.
ABŞ-da soňky hepdeler jynsparazlygy ýok etmäge degişli meselelere aýratyn üns berilýär. Munuň sebäpleriniň biri afrika-amerikan Jorj Floýduň Minneapolisde ýogalmagy boldy. Düzgüni goraýjylar 25-nji maýda ony tutanlarynda demikdiriji usuly ulandylar. Şondan soň Jorj hassahanada ýogaldy. Floýduň ölüminden soň ştatlaryň birnäçesinde garaýagyz adamlaryň hukuklarynyň kemsidilmegine garşy nägilelik aksiýalary başlandy.