Italiýa syýahatçylara mugt dynç almaklygy hödürleýär

Molize italýan sebitiniň hökümeti syýahatçylara mugt dynç alşy hödürledi. Bu barada profile.ru habar berýär. Syýahatçylar dynç alşa öz maşgalalary bilen gelip, bir hepdäniň dowamynda boş willalarda ýaşap bilýärler. Obýektleriň arasynda iki, üç we dört ýatylýan otagly görnüşleri hem bar. “The Sun” neşiriniň habar bermegine görä, Regalati il Molise (“Özüňize Molizäni sowgat ediň”) ady bilen paýnama şäheriň meriýasynyň başda durmagy esasynda Amici Del Morrutto medeni assosiasiýasy bilen hyzmatdaşlykda işe girizildi. Taslamanyň çäklerinde syýahatçylara 4-nji iýuldan 3-nji oktýabra çenli aralykda hereket etjek 40 sany mugt ýollanmany hödürlediler.
Rimden iki sagat ýol uzaklykda ýerleşýän Molizede mugt dynç alyş üçin ýörite formany italýan dilinde doldurmaly we siziň ol ýerde näme üçin dynç almak isleýändigiňizi görkezmeli. Her bir öýde 5-den köp bolmadyk adam ýaşap bilýär. Syýahatçylaryň çagyrylan sebitinde 305 müň ýaşaýjynyň ýaşaýandygy bellenilýär. Taslamanyň awtorlary köp öýleriň olaryň hojaýynlarynyň “has baý ýerlere” göçýändigi sebäpli boşaýandygyny aýdýarlar.
“Bu owadan, ýöne adamsyz obalar, olarda syýahatçylyk jaýlary ýok. Şonuň üçin biz syýahatçylygyň rekordly pes derejede ýerleşýän wagty adamlaryň bu ýerlere gelmesini nähili höweslendirip bolar diýip pikirlendik” – diýip, taslamanyň awtorlarynyň biri Enso Luongo belleýär.
Molize – koronawirus epidemiýasyndan zyýan çekmedik Italiýanyň sebitleriniň biri. Ol syýahatçylaryň arasynda kän bir meşhur däl, şonuň üçin şeýle çäre bilen sebitiň hökümeti syýahatçylaryň ünsüni özüne çekmek isleýär.