Maldiwler 15-nji iýuldan syýahatçylara serhetlerini açar, emma diňe adamsyz adalaryny

Prezident Ybraýym Muhammet Solih maldiwleriň 15-nji iýuldan başlap, syýahatçylary kabul etmäge taýýardygyny aýtdy. Bu ýerde myhmanlara hemme ýerde däl-de, diňe adamsyz adalarda garaşýarlar. Ýerli ilatyň ýaşaýan adalarynda ýerleşýän myhmanhanalar soňrak - 1-nji awgustda açylar. Bular barada "Sputnik" habar berýär.
Ýerli häkimiýet gelenleriň 30 günüň dowamynda mugt wiza alyp biljekdigine söz berdiler. Özi-de myhmanlara koronawirus barlagyndan geçmek, nähilidir bir kepilnama görkezmek ýa-da karantini berjaý etmek zerurlygy ýok.
Dynç alyş zolaklarynda myhmanlaryň ähli zerur howpsuzlyk çärelerine laýyklykda kabul ediljekdigi aýdylýar. Myhmanda keseliň alamatlary bar bolan ýagdaýda, ol öz hasabyna PCR barlagyndan geçirmeli bolar.
Maldiw adalary dünýäniň dürli künjeklerinden syýahatçylar gelýän iň meşhur dynç alyş ýeridir we syýahatçylyk ýurduň ykdysadyýetinde esasy orny eýeleýän pudakdyr. Mart aýynda adalarda koronawirus pandemiýasy bilen baglanyşykly çäklendirmeler girizilipdi, bu bolsa öz gezeginde girdejä ep esli täsirini ýetirdi. 24-nji iýunda berlen maglumatlara görä, Maldiwlerde epidemiýanyň tutuş döwründe COVID-19 ýokaşmasy bilen baglanyşykly 2323 kesel hasaba alyndy, şolardan sekizisi bolsa ölüme sebäp boldy.