Russiýanyň iri awiakompaniýalary 15-nji iýuldan halkara uçuşlary dikeltmäge taýýarlanýar

Iýul aýynyň ortalaryndan daşary ýurtlara uçuşlar dikeldilip bilner. Şeýle mümkinçiligi häzir Russiýanyň iri awiagatnadyjylary gözden geçirýär, bu barada “Interfaks” agentliginiň çeşmesine salgylanmak bilen rg.ru habar berýär.
“Täze koronawirus keseli bilen kesellänleriň sanynyň azalmagy boýunça durnukly oňyn dinamika ýagdaýynda we bortda berk sanitar düzgünlerini berjaý etmek bilen 15-nji iýuldan halkara ugurlar boýunça birbada birnäçe iri awiagatnadyjylar bilen uçuşlary dikeltmek işiniň mehanizmleri taýýarlanýar” – diýip, agentligiň çeşmesi gürrüň berýär.
Ilki bilen Ýewraziýa ykdysady bileleşiginiň we Garaşsyz döwletleriň Arkalaşygy ýurtlaryna uçuşlar dikeldiler. Beýleki ýurtlar bilen serhetler açylan ýagdaýynda olar bilen hem awiaaragatnaşyklary ýola goýlar.
Ýatladyp geçsek, Russiýa tarapyndan halkara awiagatnawlary täze koronawirus keseliniň ýaýrawy sebäpli mart aýynyň ahyrynda saklanyldy. Diňe rus raýatlaryny yzyna dolamak üçin çarterler galdyryldy. Ýol-ulag ministrliginde halkara gatnawlaryň iýul aýyndan dikeldilmegine garaşylýar. Aprel aýynda premýer-ministr Mihail Mişustin daşary ýurtlularyň ýurda girmesini çäklendirmek işini uzaltdy. Ol gadagan etmäniň ýurtda diňe epidemiologik ýagdaý gowulaşandan soň aýryljakdygyny belledi.
Russiýada tas 458 müň COVID-19 bilen keselleme ýagdaýy ýüze çykaryldy, 5,7 müň adam ýogaldy, 221 müňden gowragy sagaldy.