Apple paýnamalarynyň bahasy taryhy rekordy täzeledi

Apple amerikan korporasiýasynyň paýnama bahalary ýurduň zähmet bazarynyň statistikasy neşir edilenden soň, fond bazarlarynyň umumy ösüş fonunda taryhy rekorda ýetdi, muny söwda meýdançalarynyň maglumatlary delillendirýär. Bu barada 1prime.ru habar berýär.
Söwda meýdançalarynyň maglumatlaryna laýyklykda, kompaniýanyň kagyzlary 1,97%, ýagny paýnama üçin 328,57 dollara çenli gymmatlady, bu bolsa kompaniýanyň maliýe hasabatynyň neşirinden soň, 29-njy ýanwarda goýlan ozalky 327,85 dollar möçberdäki rekorddan geçdi. Kompaniýanyň kapitallaşdyrmasy bolsa 1,42 trillion dollara ýetdi. Ýatladyp geçsek, ýanwar aýyndan mart aýy aralygynda kompaniýanyň paýnamasy 328 dollardan 212-ä çenli pese gaçdy.
Habar berlişine görä, 23-nji martdan soň kompaniýanyň paýnamalary durnukly ýagdaýda ýokarlanyp başlady, bu kompaniýanyň işgärleriniň köpüsiniň uzakdan işlemek režimine geçmegi bilen, şeýle-de okuwçylaryň distansion bilime geçmegi bilen şertlendirilýär, çünki bu ýagdaý firma noutbuklaryna we planşetlerine bolan islege täsir etdi.
Belläp geçsek, ABŞ-nyň fond bazary zähmet bazarynyň statistikasynyň neşirinden soň, esasy görkeziji boýunça 2-3% ösüp başlady. Resmi maglumatlara laýyklykda, maý aýynda ýurtda işsizlik 1940-njy ýyldaky 14,7% görkezijili rekorddan bäri 13,3%-e çenli kemeldi, analitikler bolsa bu görkezijiniň 20%-e çenli ýokarlanmagyna garaşypdylar.
Mundan başga-da, Ştatlaryň ykdysadyýetiniň oba hojalygy däl pudaklarynda iş ýerleriniň sany 2,509 million sany artdy.