ABŞ hytaý awiakompaniýalaryna uçuşy gadagan edip biler

ABŞ-nyň Prezidenti Donald Trampyň administrasiýasy ähli hytaý awiakompaniýalaryna Birleşen Ştatlar bilen Hytaýyň arasynda söwda ýolagçy gatnawlaryny amala aşyrmagy gadagan edýär. Bu ABŞ-nyň Ýol-ulag ministriniň buýrugyndan gelip çykýar. Bu barada TASS habar berýär.
Gadagan etme 16-njy iýundan güýje girer, ýöne resminamada bellenilişine görä, eger-de degişli çözgütler Tramp tarapyndan kabul edilse, munuň ir bolmagy hem ahmal. Bu çäre ýedi sany awiakompaniýa degişli edilýär, olaryň hatarynda Air China, China Eastern Airlines, China Southern Airlines we Hainan Airlines kompaniýalary bar.
ABŞ-nyň Ýol-ulag ministrligi gadagan etmäniň Hytaýyň hökümetiniň “amerikan awiagatnadyjylaryna Hytaýa we Hytaýdan yzygiderli ýolagçy gatnawlaryny amala aşyrmakda olaryň ikitaraplaýyn hukugyndan doly derejede peýdalanmaga rugsat bermändigi” bilen baglydygyny nygtaýar. “Biz şeýle ýagdaýlar Ýol-ulag ministrliginden amerikan we hytaý awiagatnadyjylaryň yzygiderli ýolagçy awigatnawlaryň bazarynda bäsdeşlik deňagramlylygyny, adalatly we deň mümkinçiligi dikeltmäge gönükdirilen herekete geçmekligi talap edýär diýen netijä geldik” – diýlip, resminamada aýdylýar.
Ýöne şunuň bilen birlikde amerikan edarasynda hytaý hökümeti “öz hereketini düzeden ýagdaýynda”, amerikan awiagatnadyjylary üçin ýagdaýy gowulandyrmaga ýardam berer ýaly Waşingtonyň öz çözgüdini täzeden gözden geçirmäge taýýardygy bellenildi.
Belläp geçsek, ýanwar aýynyň ahyrynda koronawirus ýaýrawynyň esasynda Waşington ýakynda HHR-de bolan daşary ýurtlulara ABŞ-da girmegi gadagan etdi. Awiauçuşlara islegiň pese gaçmagy bilen Hytaýa yzygiderli ýolagçy awiagatnawlaryny amala aşyrýan üç sany amerikan awiakompaniýasy bu ýurda gatnawlaryň sanyny azaltdy. Hytaý awiakompaniýalary hem gatnawlaryň bir bölegini ýatyrdy. Pandemiýanyň esasynda fewral aýynda ýurtlaryň arasyndaky gatnawlaryň sany 20-ä çenli kemeldi, bu gatnawlary-da hytaý awiakompaniýalary alyp barýardy.