Apple dakylýan elektronikanyň bazarynda ýene-de lider boldy

Bu IDC analitik kompaniýasynyň 2020-nji ýylyň birinji çärýegi üçin niýetlenen hasabatyndan gelip çykýar. Bu barada life.ru habar berýär. Bu kategoriýadan ýerlenen gurluşlaryň umumy sany 72,6 milliona deň. Olardan 21,2 milliony Apple kompaniýasynyň paýyna düşdi. Olaryň arasynda smart-sagatlary, şeýle-de simsiz nauşnikler bar. Şeýlelik bilen, Apple tutuş bazaryň 29,3%-ni eýeledi.
Eger-de umumy statistikadan Apple Watch sagatlaryny aýratynlandyrsak, onda şeýle görkeziji alynýar. Ýerlenen sagatlaryň sany – 4,5 mln. Bazar paýy – 26,8%.
Ikinji orunda Xiaomi hytaý kompaniýasy ýerleşdi. Ol 10,1 mln sany tehnikany ýerledi. Bu kompaniýa bazaryň 14%-i degişli. Samsung we Huawei kompaniýalary degişlilikde, 11,9% we 11,1% paý bilen üçünji hem-de dördünji orunlary eýelediler. Bäşlige Fitbit (2,2 mln) kompaniýasy hem girdi.
Dakylýan gurluşlaryň umumy üpjünçiligi 2020-nji ýylyň birinji çärýeginde ýyllyk hasabynda 29,7% ýokarlandy. Üpjünçiligiň iň ýokary ösüşini simsiz nauşnikler görkezdi, oňa dakylýan gurluşlaryň umumy bazarynyň 54,9%-i degişlidir. 2019-njy ýylyň birinji çärýegi bilen deňeşdirilende bu görnüşli gurluşlaryň üpjünçiligi 68,3% ýokarlandy.
Ýatladyp geçsek, “dakylýan elektronika” adalgasy bedeniňde aksessuar ýa-da egin-eşikde ulanylýan materialyň bir bölegi hökmünde dakyp bolýan elektron gurluşlar bilen berkidildi. Intellektual dakylýan gurluşlar simsiz tehnologiýanyň üsti bilen smartfona birikdirilýär, bu bolsa olara köp sanly “bulut” serwisleri bilen işleşmäge mümkinçilik berýär.