Şu ýylyň 1-nji iýunyndan Türkiýe içerki howa gatnawlaryny dikeldýär. Awiagatnawlar 28-nji martda täze görnüşli koronawirus ýokanjynyň ýaýramak howpy sebäpli ýatyrylypdy, diýip Türkiýäniň ulag we infrastruktura ministri Adil Karaismailogly belledi. Bu barada türk habar beriş serişdelerine salgylanyp, Trend agentligi habar berýär.
Onuň aýtmagyna görä, içerki gatnawlar boýunça ilkinji uçuşlar Stambuldan Ankara, Izmire, Antaliýa we Trabzona amala aşyrylar. Beýleki howa menzillerinden uçuşlar tapgyrlaýyn esasda ýola goýlar.
«Ilkinji awiagatnaw ýerli wagt bilen 10:00-da Stambuldan Ankara amala aşyrylar» diýip ministr belledi.
Karaismailoglynyň nygtaýşy ýaly, ýurduň howa menzilleriniň ählisinde täze görnüşli koronawirus ýokanjynyň öňüni almak boýunça çäreler görüldi.
Howa menzilleriniň işi ýolagçylaryň we işgärleriň saglygyna howpy peseltmek nukdaýnazaryndan ýola goýuldy. Munuň üçin degişli şahadatnamalar berildi, diýip ministr belledi. Şeýle hem ministr ilata howa ulagyndan peýdalanmakdan çekinmezlige çagyrdy.
1-nji iýundan Türkiýe içerki howa gatnawyny dikeldýär
- 31.05.2020 18:05
- 8.7k+
