Şweýsar sagatlarynyň eksporty aprel aýynda rekord derejede 81% pese gaçdy

Şweýsariýada sagatlaryň önümçiliginiň we satuwynyň koronawirus pandemiýasy şertlerinde saklanylmagy bilen olaryň eksporty 2020-nji ýylyň aprel aýynda geçen ýylyň şu aýy bilen deňeşdirilende rekord depgini bilen 81% pese gaçdy. Bu barada Interfax habar berýär. Aprel aýynda eksport 300 müň sagada barabar boldy, bu bolsa 78,6% pese gaçyşlykdyr. Esasan, polat hem altyndan edilen sagatlaryň üpjünçiligi kemeldi (90,3%), polatdan edilen sagatlaryň üpjünçiliginiň peselmegi beýlekilere garanda pes (77,8%).
Eksportuň göwrümi 328,8 mln şweýsar frankyna çenli ($340 mln) kemeldi, muny Şweýsar sagat senagaty federasiýasynyň maglumatlary hem delillendirýär. Paýyna eksportuň esasy bölegi düşýän el sagatlarynyň daşary ýurtlara ýola iberilmegi 82%, ýagny 299,3 mln franka çenli pese gaçdy. Şweýsar sagatlarynyň Gonkonga eksporty 83%, ABŞ-a – 86%, Günorta Koreýa – 68%, Ýaponiýa – 86%, Germaniýa – 82% pese gaçdy. 
“Hytaý bazary aprel aýynda esasy trendden çykdy. HHR-e ýola goýma mart aýyndaky 10,5% ösüşden soň bary-ýogy 16,1% peseldi, bu bolsa bazaryň dikelip başlandygyny görkezýär. Hytaýyň paýyna aprel aýynda eksportuň üçden bir bölegi düşdi” – diýlip, Şweýsar sagat senagaty federasiýasynyň press-relizinde aýdylýar.
Beýleki bazarlarda düýpli pese gaçyş islegiň ýokdugyny däl-de, ýagdaýyň düýbünden başgadygyny görkezýär diýlip, habarnamada bellenilýär.
Citi ekspertleri ýagdaý şu ýylyň ikinji ýarymynda doly derejede gowulanmaz diýip hasaplaýarlar. “Şweýsar sagat pudagy heniz hem çözülmesi hökmany bolan artyk öndürmeklik, innowasiýany ornaşdyrmakda haýal depginler we önümiň hataryny täzelemek ýaly düzüm meseleleri bilen çaknyşýar” – diýip, Dow Jones agentligi Citi analitikleriniň sözüni getirýär.