TikTok programmanyň içindäki söwda boýunça YouTube we Netflix-den öňe geçdi

TikTok programmanyň içindäki söwdanyň girdejisi boýunça YouTube we Netflix programmalaryndan öňe geçdi. Bu söwdada TikTok we onuň hytaý görnüşi Douyin aprel aýynda $78 mln gazandy. Bu YouTube, Netflix we Tinder programmalaryna garanda köpdür diýip, Forbes neşirine salgylanmak bilen vedomosti.ru habar berýär.
Maglumatlar boýunça, 2019-njy ýylyň aprel aýy bilen deňeşdirilende hytaý ByteDance kompaniýasy tarapyndan işlenilip düzülen TikTok we Douyin programmasynyň girdejisi 10 esse ýokarlandy. Girdejiniň 86,6%-ini hytaý bazary, 8,2%-ini ABŞ-nyň bazary düzdi. Bu programmalaryň ikisinde-de halan awtorlaryňy goldamaklyga sarp edip bolýan içki walýutanyň söwda ulgamy bar. TikTok hem, Douyin hem programmanyň içindäki söwda boýunça Google Play-iň onlugyna girmedi, ýöne App Store programmalarynyň arasynda birinji orny eýelediler. Umumy reýtingiň ikinji ornunda YouTube ýerleşdi, onuň girdejisi tas $76 milliona barabar boldy. Ol 2019-njy ýylyň aprel aýy bilen deňeşdirilende 57% ýokarlandy. Programmanyň içindäki söwdadan gelen girdejisiniň esasy bölegini ABŞ (56,4%) düzdi, ikini orunda Ýaponiýa (11%). Bäşlige Tinder, Disney+ we Tencent Video wideoserwisi hem girdi.
Bloomberg Emarketer derňew geçiriji kompaniýanyň maglumatlaryny getirýär: onuň çaklamasy boýunça, ABŞ-da 14 ýaşly we ondan ýokary ýaşly sosial torlardan 75 mln peýdalanyjy programmanyň içinde iň bolmanda bir gezek söwda edýär – ösüş 2019-njy ýyl bilen deňeşdirilende 17,3%. 20-nji maýda ByteDance kompaniýasynyň bazar bahasy $100 mlrd-dan geçdi. Kompaniýanyň ilkinji programmasy Toutiao boldy, 2016-njy ýylda TikTok programmasy işe girizildi.
Kompaniýanyň öz hasaplamasy boýunça, dünýäde TikTok programmasyny ulanyjylaryň sany 700 milliondan geçýär, olaryň 40% töweregi 18 ýaşly. 
Aprel aýynyň başynda ByteDance kompaniýasy koronawirusa garşy göreşe kömek üçin lukmançylyk we jemgyýetçilik guramalaryna $350 mln sarp etjekdigini habar berdi.