Beýik Britaniýada ýurda gelýänleriň ählisi üçin karantin giriziler

Beýik Britaniýa COVID-19 koronawirus keseliniň ýaýramagyna garşy göreşmegiň çäklerinde 8-nji iýundan ýurda gelýänleriň ählisini 14 gün üzňelikde saklamaly eder. Bu barada Sky News telekanaly Birleşen Şalygyň Içeri işler ministri Priti Patele salgylanmak bilen habar berýär, muny russian.rt.com ýetirýär.
“Täze düzgünler 8-nji iýundan güýje girer we Birleşen Şalyga gelýänleriň ählisi seýrek kadadan çykma bilen 14 gün üzňelikde saklanmaly bolarlar” – diýip, ministr belleýär.
Ol karantiniň bozulandygy üçin jerimäň £1 müňe barabar boljakdygyny belleýär. Britaniýanyň serhedinden geçilenden soň, gelýän adamlar öz aragatnaşyk maglumatlaryny häkimiýetlere habar bermeli bolarlar. Karantiniň berjaý edilýändigine gözegçilik etmek üçin ýörite barlaglar geçiriler. 
Patel şeýle çäreleriň koronawirusyň ikinji “tolkunynyň” ýüze çykmazlygy üçin alnyp barylýandygyny anyklaşdyrdy. 
Eger-de daşary ýurt myhmanynyň ýaşaýan ýeri bellenilen tabşyryklara gabat gelmese, onda ol hökümet tarapyndan gurnalan myhmanhana jaýlarynda üzňelikde saklanylar. Gelen adamlara Britaniýada jemgyýetçilik ulagyndan diňe karantin gutaranda ulanmak rugsat beriler, şoňa çenli ol hereket etmegiň diňe indiwidual serişdesini ulanmaly bolar.
Ýöne COVID-19 bilen göreşde kärdeşlerine kömek etmäge Irlandiýadan gelýän lukmanlar, ýük daşama gurşawynda işleýänler, şeýle-de daşary ýurtlaryň resmi adamlary karantini geçmezler.
Öň, britan premýeri Boris Jonson Beýik Britaniýanyň COVID-19 koronawirus keseli bilen kesellemekligiň ýokary derejesini başdan geçirendigini habar berdi.