Türkiýäniň aeroportlarynda koronawirus üçin hökmany barlaglar giriziler

Türkiýe epidemiýa gutarandan soň, syýahatçylar üçin çäklendirmeleri girizer. Syýahatçylardan hiç biri koronawirusyň ýoklugy baradaky kepilnamasyz ýurda girip bilmezler diýlip, rusplt.ru saýtynda bellenilip geçilýär.
Bu barada medeniýet we syýahatçylyk ministri Mehmet Nuri Ersoý mälim edýär. Onuň aýtmagyna görä, daşary ýurtlardan gelýän ýerli ýaşaýjylar we daşary ýurtlular aeroportda koronawirus üçin hökmany barlagdan geçmeli. Iýundan başlap saglygy goraýyş ministrligi Türkiýäniň esasy howa duralgalarynda ýörite barlaghanalary gurnar. Barlag pasport gözegçiliginden geçilýänçä ýerine ýetiriler we ol bary-ýogy 2-3 minut alar.
Netije 5-6 sagat geçenden soň belli bolar. Eger-de ol položitel bolsa, syýahatçylary olaryň gatnaşan adamlary bilen birlikde myhmanhanada üzňelikde saklarlar.
Ýatladyp geçsek, Türkiýe 2020-nji ýylyň maýynda myhmanhanalary şahadatnamalaşdyrmak işine başlamagy meýilleşdirýär. “Halkara şahadatnamalaşdyryş guramalary tarapyndan berilýän şahadatnama awiakompaniýalarda, aeroportlarda we beýleki ýol-ulag obýektlerinde, ýaşaýyş toplumlarynda hem-de jemgyýetçilik iýmit kärhanalarynda saglygy we zähmet gigiýenasyny goramak boýunça ýokary talaplaryň ýerine ýetirilmegini resmi taýdan tassyklaýar” – diýlip, Türkiýäniň medeniýet we syýahatçylyk ministrliginde bellenildi.