ABŞ-da ýakyn günlerde firma önümli birnäçe dükanlar açylyp başlanar, bu barada CNBC telekanalyna salgylanmak bilen rossaprimavera.ru habar berýär.
“Biz ABŞ-da dükanlary açyp başlaýandygymyza begenýäris” – diýip, kompaniýada belleýärler.
Ilkinji nobatda, dükanlar Aýdaho, Günorta Karolina, Alabama ştatlarynda we Alýaskada açylyp başlanar. Söwda nokatlary koronawirusyň ýaýramagyna garşy öňüni alyş çärelerini berjaý etmek bilen hereket ederler. Dükanlarda oňa gelýän adamlaryň sany çäklendiriler we dükandan çykylanda alyjylaryň temperaturalary barlanylar.
Apple koronawirus epidemiýasy bilen bagly ýagdaýyň ösüşini we kompaniýanyň dükanlary bar bolan sebitleriň hökümetleriniň maslahatlaryny gözegçilikde saklaýar.
“Biz dükanlarymyzy arkaýyn açmaga mümkinçilik bolan ýagdaýynda, muny ederis” – diýip, kompaniýanyň wekilleri belleýärler.
Ýatladyp geçsek, COVID-19 ýaýrap başlanyndan soň, kompaniýanyň dükanlary, Hytaýy hasap etmezden, ählisi ýapyldy. Soňky hepdelerde Günorta Koreýada, Awstraliýada we Germaniýada hem birnäçe dükanlar açyldy.
Belläp geçsek, Apple kompaniýasynyň firma dükanlary önümleri satmakda esasy element bolup hyzmat etdiler. Şunuň bilen birlikde, kompaniýada şu ýylyň birinji çärýeginde internet-söwdanyň ep-esli ösendigi bellenilýär.
