Pekin bilen Waşington söwda ylalaşygyny alyp barmak barada gepleşdiler

Pekin bilen Waşington söwda ylalaşygynyň birinji döwrüniň şowly amala aşyrylmagyna ýardam etmek barada gepleşdiler, bu barada “Sinhua” agentligine salgylanmak bilen rossaprimavera.ru habar berýär.
Bellenilip geçilişi ýaly, taraplar makroykdysadyýet pudagynda özarahereketi berkitmek barada maslahatlaşdylar. Duşuşyk telefon formatynda geçirildi, oňa ABŞ bilen söwda boýunça gepleşiklerde hytaý wekiliýetiniň ýolbaşçysy Lýu He, ABŞ-nyň maliýe ministri Stiwen Mnuçin we söwda wekili Robert Laýthazer gatnaşdy.
Taraplaryň söwda ylalaşygynyň birinji döwrüniň çäklerinde hereket etmek üçin özarahereketleri sazlamak we yzygiderli gatnaşygy saklamak barada ylalaşyga gelendigi habar berilýär.
Pekin bilen Waşingtonyň arasyndaky söwda ylalaşygynyň birinji döwri boýunça şertnama 15-nji ýanwarda gol çekildi. Ylalaşygyň çäklerinde Hytaý amerikan harytlarynyň satyn alynmasyny iki ýylyň içinde 2017-nji ýyldaky $200 mlrd baza derejesinden ýokarlandyrmaga boýun boldy.
Emma dünýä ykdysadyýetine ululygy boýunça ikinji düýpli ýitgini getiren koronawirus pandemiýasy Hytaýyň satyn alma işlerini tamamlap bilmegini şübhe astyna goýdy.
ABŞ-nyň söwda wekiliniň edarasynda iki tarap hem saglygy goraýyş pudagynda häzirki global möçberdäki adatdan daşary ýagdaýa seretmezden, ylalaşygyň çäklerinde öz borçlaryny wagtynda ýerine ýetirmeklige razy boldular. Maý aýynda ABŞ-nyň prezidenti Donald Tramp Hytaýyň şertleşik boýunça öz borçlaryny ýerine ýetirmedik ýagdaýynda şertnamany ýatyrjakdygyny habar berdi.