Apple iPhone-iň satuwyndan gelýän girdejiniň pese düşendigini habar berdi

Apple kompaniýasynyň 2019/20-iň iki çärýegi boýunça arassa girdejisi (ABŞ-da ikinji maliýe çärýegi 28-nji martda tamamlandy) ýyllyk aňlatmasynda 6% ýokarlandy we $33,4 mlrd-a barabar boldy, bu barada kommersant.ru saýtynda bellenilip geçilýär. Kompaniýanyň girdejisi ýarymýylyň içinde 5,5%, ýagny $150,1 mlrd-a çenli ýokarlandy diýlip, kompaniýanyň 30-njy aprelde neşir edilen hasabatynda aýdylýar.
Şonuň bilen birlikde ikinji maliýe çärýeginde kompaniýanyň arassa girdejisi 2,7%, ýagny $11,2 mlrd-a çenli pese düşdi (satuw göwrüminde $58,3 mlrd). Hususanam, iPhone-iň satuwyndan gelýän girdeji 6,7% pese düşüp, $28,9 mlrd-a barabar boldy, Mac-dan gelýän girdeji 3%, ýagny $5,3 mlrd-a çenli, iPad – 10%, ýagny $4,3 mlrd-a çenli pese düşdi. Operasion girdeji $13,4 mlrd-dan $12,8 mlrd-a çenli kemeldi.
“COVID-19-yň global täsirine garamazdan, biz Apple kompaniýasynyň çärýek boýunça ösüşi görkezendigini buýsanç bilen habar berýäris” – diýlip, hasabatda Apple-iň baş müdiri Tim Kukuň sözleri getirilýär.
Apple Watch we AirPods-y öz içine alýan Wearables, Home and Accessories segmentleriniň satuwy 22,5%, ýagny $6,2 mlrd-a çenli ýokarlandy, Services bölümçesi 16,6%, ýagny $13,3 mlrd rekord görkezijä çenli ýokarlandy.
Ýatladyp geçsek, 2019/20 ýylyň birinji çärýeginde Apple çärýek boýunça $91,8 mlrd rekord girdejisi barada hasabat berdi. Öň, Bloomberg Apple kompaniýasynyň dört sany täze smartfony çykarjakdygyny, olaryň dizaýnynyň bolsa iPad planşetleriniň soňky wersiýasyna meňzeş boljakdygyny habar berdi.