Mask emläginiň satuwy barada habar berdi

Amerikan biznesmeni Ilon Mask Twitterde ýazan bir habarynda özüniň emlägini satmakçy bolýandygyny aýdýar. Bu barada ria.ru habar berdi. Ýagny, ol ilki özüniň ähli emlägini, şol sanda hususy öýüni satýandygy barada ýazýar. Şondan soň ol onuň üstüne “Teslanyň” paýnamalarynyň örän gymmatdygy baradaky pikirini goşýar.
Şundan soň awtoöndürijiniň paýnamalary 9,35%, ýagny 708,77 dollara çenli arzanlaýar, şonuň bilen birlikde söwda ugrunda hem olaryň bahasy 683 dollara çenli pese düşýär.
Bir zady belläp geçmek gerek, “Teslanyň” ýolbaşçysy kompaniýanyň Fremontdaky kärhanasynyň azyndan maýyň ahyryna çenli ýapyk boljakdygy baradaky habary negatiw kabul etdi, sebäbi Maskyň elektromobil kärhanalary biznesiň “durmuş ähmiýetli” kategoriýasyna goşulmady. Bu bolsa biznesmeniň “özüňi üzňelikde saklamak” çärelerini “faşizm” diýip atlandyrmagyna we “amerikalylara erkinligi gaýdyp bermegi talap etmegine” getirdi.
Öň Maskyň birža we gymmat kagyzlar boýunça amerikan Komissiýasy bilen oňşuksyzlygy bardy. Bu waka 2018-nji ýylyň awgustynda Maskyň “Teslany” hususy kompaniýa etmek baradaky habaryndan soň bolup geçýär. Netijede geçen ýyl Mask Komissiýa bilen şertnama baglaşmaly boldy, oňa laýyklykda indi Maskyň Teslanyň ýuristleri bilen ylalaşmazdan Twitterde kompaniýa barada ýazmaga haky ýokdur.
Ol şu wakadan soň 20 million dollar jerime töledi we Teslanyň Direktorlar geňeşiniň başlygy wezipesinden üç ýyl gitdi.
Şu ýylyň mart aýynyň ahyrynda bolsa Mask COVID-19 pandemiýasy sebäpli girizilen çäklendiriji çäreleriň basym ýatyrylmagyna çagyrýan beýannamasy bilen çykyş etdi.
Öň, koronawirus pandemiýasyna garamazdan, ABŞ-nyň käbir milliarderleriniň, şol sanda Amazon kompaniýasyny esaslandyryjy Jeff Bezosyň we Tesla kompaniýasynyň eýesi Ilon Maskyň öz baýlygyny onlarça milliard dollar artdyrandyklary habar berildi.