Facebook kompaniýasynyň mahabat girdejisi birinji çärýekde 17% artdy

2020-nji ýylyň birinji çärýeginde Facebook kompaniýasynyň arassa girdejisi ýyllyk aňlatmasy boýunça tas $4,9 mlrd-a çenli artdy. Şeýle maglumatlar kompaniýanyň hasabatynda getirilýär. Paýnama girdejisi $1,71-e barabar boldy, geçen ýyl ol $0,85-e deň bolupdy. Bu barada adindex.ru habar berýär.
Internet torunyň girdejisi 18%, ýagny $17,737 mlrd-a çenli ýokarlandy. Mahabatlardan gelýän girdeji çärýek boýunça 17%, ýagny $17,44 mlrd-a çenli artdy. Işjeň ulanyjylaryň sany mart aýy boýunça ýyllyk aňlatmasynda 10%, ýagny 2,6 mlrd adama çenli ýokarlandy.
Facebook programma toplumyndan (Facebook, Instagram, WhatsApp ýa-da Messenger) geçen çärýekdäki 2,89 milliard bilen deňeşdirilende aýda 2,99 milliard ulanyjynyň peýdalanýandygyny belläp geçýär. ABŞ-da we Kanadada Facebook-dan işjeň peýdalanyjylaryň sany geçen çärýekdäki gündeki 190 million bilen deňeşdirilende 195 million ulanyja çenli ýokarlandy. Facebook-yň ulanyjylar bazasy geçen çärýekdäki gündeki 294 million işjeň ulanyjylar bilen deňeşdirilende 305 milliona çenli ýokarlandy. Kompaniýanyň “beýlekiler” kategoriýasyndaky girdejisi çärýek boýunça $297 milliona barabar boldy, bu bolsa geçen ýyl bilen deňeşdirilende 80% köpdür.
Şonuň bilen birlikde, kompaniýada çykdajylaryň azalandygy hem bellenilýär. Iş saparyna gitmek we çäreleri geçirmek mümkinçiliginiň bolmandygy sebäpli kompaniýa $2 milliarddan $4 milliarda çenli tygşytlady.
Facebook kompaniýasynyň hasabatynda 2020-nji ýylyň birinji çärýeginiň soňky üç hepdesinde mahabata bolan islegiň ep-esli pese düşendiginiň, bahasynyň hem azalandygynyň hasaba alnandygy bellenilip geçilýär. Ýöne aprelden başlap onuň durnuklaşandygy görünýär. Kompaniýanyň kapitallaşdyrmasy ýyl boýunça 0,6% ýokarlandy we häzir $521 mlrd-dan geçýär.
Öň, 2020-nji ýylda koronawirus sebäpli Facebook we Google kompaniýalarynyň mahabat girdejisinden umumylykda $44 mlrd ýitirip biljekdigi habar berildi.