Oppo we Vivo Hytaýda Huawei-ni üçünji orna süýşürdiler

Mobil telefonlaryny öndürijiler Oppo we Vivo hytaý bazaryndan özleriniň esasy bäsdeşini çykarmagy başardylar. 2020-nji ýylyň birinji çärýegi boýunça Huawei iň köp satyn alynýan brendleriň reýtinginde üçünji orny eýeledi, bu barada dni24.com habar berýär.
Koronawirus pandemiýasy Hytaýda smartfonlara bolan islegi tas 40% pese düşürdi. Esasanam, çökgünlik Huawei brendine has güýçli täsir etdi, şonuň netijesinde brend köp wagtdan soň ilkinji gezek Hytaýyň bazarynda öňdebaryjylygyny ýitirdi. Soňky maglumatlara laýyklykda, Oppo we Vivo kompaniýalary satuwyň umumy göwrümi boýunça degişlilikde 21,4% we 20,5% görkeziji bilen Huawei brendini üçünji orna düşürdiler. Ýöne bir zady anyklaşdyrmak gerek, bu alnan maglumatlarda Honor-yň, ýagny Huawei-niň bölünip aýrylan kärhanasynyň satuwy hasaba alynmady. Jemi alanyňda olaryň görkezijisi 29,9%-e barabar bolýar (20,2% - Huawei, 9,7% - Honor), şonuň üçin brend hakykatda bäsdeşlerinden yza galmaýar. Dördünji setir Xiaomi kompaniýasyna – 10,3%, bäşinji bolsa Apple kompaniýasyna – 10,1% degişli boldy.
Ýanwar aýy boýunça Hytaýda 6,34 million mobil gurluşlary satyldy, bu bolsa geçen ýylyň degişli döwri bilen deňeşdirilende 55% azdyr. Tehnikany öndürijiler koronawirus pandemiýasy bilen baglylykda uly ýitgä sezewar bolýarlar, şonuň üçin Hytaýyň hökümeti ýurtda ykdysady ýagdaýy durnuklaşdyrmak üçin çäklendirmeleri gowşadýar.