Apple gyzyl iPhone SE-niň satuwyndan gelen girdejileri koronawirus bilen göreşe sarp eder

Apple kompaniýasy eýýäm köp ýyl bäri Product Red haýyr-sahawat kampaniýasyny ýöredýär – kompaniýa smartfonlary we aksessuarlary gyzyl reňkde çykarýar, olaryň satuwynyň bir bölegi afrikan ýurtlarynda WIÇ/SPID kesellerine garşy göreşe iberilýär. Häzir kompaniýa bu haýyr-sahawat çäresiniň serişdeleriniň bir bölegini pandemiýa döwründe tutuş dünýä boýunça saglygy goraýyş sistemalaryna kömege ibermek kararyna geldi. Bu barada hi-tech.mail.ru saýty habar berýär.
30-njy sentýabra çenli gyzyl iPhone SE (2020) smartfonunyň, iPhone 11 ýa-da iPhone XR-iň satuwyndan, şeýle-de aýfonlar üçin gyzyl daşlyklaryň we sagatlar üçin guşaklaryň satuwyndan gazanylan puluň bir bölegi sanjymlary taýýarlamaga kömek etjek COVID-19 bilen göreş boýunça Global fonduna hem-de koronawirusdan has köp ejir çeken aýratyn sebitlere iberiler.
Product Red haýyr-sahawat kampaniýasyna Nike we Starbucks hem gatnaşýar, ýöne Apple has köp goşant goşýar. Apple Product Red-iň önümlerinden gelýän girdejiniň haýsy böleginiň haýyr-sahawat işine sarp edilýändigini aýdanok, ýöne, meselem, 2018-nji ýylda kompaniýa “gyzyl” aýfonlaryň we aksessuarlaryň satuwyndan 200 million dollar aldy.
Kompaniýa kämilleşdirilen kameraly we Apple A13 täze prosessorly, iPhone 8-iň doly nusgasy bolan iPhone SE smartfonunyň anonsyndan soň koronawirusa garşy göreşe kömek etmek barada habar etdi. Apple-iň saýtynda öňki iPhone 8 eýýäm satuwdan aýryldy, ýöne beýleki dükanlarda heniz hem satylýar.