Subaru uçarlar üçin bölekleri çykarýan iki kärhanasynyň işini togtadýar

Subaru ýapon kompaniýasy Ýaponiýanyň merkezi bölegindäki Aýti prefekturasynda ýerleşýän uçarlar üçin bölekleri çykarýan iki sany kärhanasynyň önümçiligini togtadýar. Bu barada Ýaponiýanyň jemgyýetçilik telewideniýesi habar berýär, diýip Trend TACC-a salgylanmak bilen ýetirýär.
Bu kärhanalarda howa gämileriniň ganatlaryny we fýuzelýažyny birikdiriji bölekler öndürilýär. Işiň saklanylmagy bu bölekleri satyn alýan Boeing amerikan korporasiýasynyň işiniň bes etmegi bilen bagly. Önümçiligiň saklanylmagy 1-nji maýa çenli dowam eder.
Öň, Subaru täze koronawirus ýaýrawynyň howpy sebäpli özüniň Ýaponiýadaky ähli awtomobil kärhanalarynyň işini 1-nji maýa çenli togtadýandygyny habar berdi.
Ýaponiýada täze koronawirus bilen kesellänleriň umumy sany 10 müňe ýetdi, olaryň arasynda Iokogama portunda bir aýlap karantinde bolan Diamond Princess kruiz laýneriniň ýolagçylary we ekipaž agzalary hem bar. Kesellänleriň 197-si agyr ýagdaýda, ýurtda 203 ölüm bellige alyndy.