Hytaý kärhanalary daşary ýurt inženerleriniň ýetmezçiliginden kynçylyk çekýär

Hytaý kompaniýalary ýurda daşary ýurt hünärmenleriniň gelip bilmeýändigi üçin önümçiligiň depginini gowşadýarlar we önümleri çykarmak işini soňa goýýarlar, bu barada “Nikkei Asian Review” neşirine salgylanmak bilen rossaprimavera.ru habar berýär.
Koronawirus pandemiýasynyň esasynda beýleki döwletleriň ýaşaýjylary üçin Hytaýyň serhetleriniň ýapylmagy hytaý kompaniýalarynyň daşary ýurtlulary täze enjamlaryň önümçiligine çekmek mümkinçiligini ýokary derejede çäklendirdi.
Suwuk kristally panelleriň çykarylyşyna ýöriteleşdirilen BOE Technology Group firmasy özüniň önümçilik kuwwatyny artdyrmak işini hem soňa goýdy, sebäbi montaž we enjamlary gutarnykly gurnamak üçin ýapon işgärleri gerek bolup durýar, olar bolsa heniz Hytaýa girip bilenoklar.
Şunuň esasynda 2020-nji ýylda suwuk kristally panelleri çykarmak boýunça meýilnamalaryň üçden bir bölegi kemeler, bu bolsa dünýäde çykarylýan telewizorlaryň sanynyň 4% azalmagyna getirer.
Mart aýynda ýat çipleriniň önümçiligi boýunça Hytaýda kärhana açan Koreýanyň Samsung elektronika öndürijisi enjamlary ahyryna çenli gurnap bilmek mümkinçiligi bolmandygy sebäpli önümçilige başlamak işini soňa goýýar.
Şeýle-de Ýaponiýanyň köp kompaniýalary hem Hytaýdan talap edilýän tehniki önümi ýygnamak üçin gerek bolan detallary alyp bilenoklar. Panasonic firmasy satuwdan kesgitli modelleriň noutbuklaryny aýyrdy, Nikon bolsa täze fotoapparatynyň tanyşdyrylyşyny bir aý yza süýşürdi.