Xerox HP kompaniýasyny satyn almakdan gutarnykly ýüz öwürdi

Xerox amerikan korporasiýasy HP (Hewlett-Packard) kompaniýasyny satyn almak synanyşyklaryndan ýüz öwürdi. Bu barada “The Wall Street Journal” gazeti özüniň elektron wersiýasynda habar berdi, muny Trend TACC-a salgylanmak bilen bize ýetirýär.
Olaryň maglumatlary boýunça, Xerox bäş aý synanyşykdan soň HP kompaniýasyny $30 mlrd-dan ýokary satyn almak teklibini goýbolsun etmegi we printerleri hem-de personal kompýuterleri öndürýän bu kompaniýanyň ýolbaşçylygyny duşmançylyk ýoly bilen üýtgetmek ideýasyndan ýüz öwürmegi meýilleşdirýär. Neşiriň ýazmagyna görä, korporasiýada bazardaky täze koronawirusyň esasynda dörän kesel pandemiýasynyň netijeleri bilen şertlendirilen ýakymsyz ýagdaýlar sebäpli şeýle maksada ýetmek ugrunda edilýän synanyşyklar maksadalaýyk däl diýlip hasaplanyldy.
Gazetiň habar bermegine görä, HP kompaniýasynyň ýolbaşçylygy Xerox-yň birleşmek teklibinden üç gezek boýun gaçyrdy we muny teklip edilýän ylalaşygyň “HP kompaniýasynyň derejesini peseltjekdigi, şonuň üçin maslahatlaşmagyň gerek däldigi” bilen düşündirdi. Kompaniýa bäsdeşiniň fond bazarynda gymmat kagyzlary satyn almagyň hasabyna gözegçiligi ele almak boýunça etjek synanyşygyna ýol bermezlik üçin hatda öz paýnamalaryny $15 mlrd-a yzyna satyn aldy.
Kopiýa apparatlaryny öndüriji Xerox-yň kompýuterleri we beýleki tehnikalary çykarýan HP korporasiýasyny satyn almak barada özüniň teklibi bilen çykyş edendigi geçen ýylyň noýabrynda belli boldy. Reýter agentligi Xerox-yň HP kompaniýasyna $33 mlrd tölemäge taýýardygyny belledi. Soňky maglumatlara laýyklykda, HP kompaniýasynyň bazar kapitaly $30,96 mlrd-dan $25 mlrd-a çenli peseldi, Xerox-yňky, takmynan, $8,1 mlrd-dan tas $4 mlrd-a çenli peseldi.