Samsung Display kompaniýasy LCD-displeýleriň önümçiligini bes eder

2021-nji ýyldan Samsung Display günorta koreý kompaniýasy suwuk kristally LCD displeýleriniň önümçiligini bes eder. Bu barada kompaniýanyň wekillerine salgylanmak bilen Regnum informasion agentligi we internet neşiri habar berýär.
Olaryň aýtmagyna görä, kompaniýanyň girdejisini we bazarda bäsdeşlige ukyplylygyny artdyrmak üçin, kompaniýa önümçiliginde Quantum Dot (QD) tehnologiýalary ulanylýan displeýleriň çykarylmagyna ünsi gönükdirmeli.
Önümiň bu görnüşiniň 2020-nji ýylyň ahyryna çenli önümçiligini bes etmelidigi baradaky çözgüt suwuk kristally ekranlara we smartfonlara bolan islegiň pese gaçmagy esasynda kabul edildi. Ýedinji we sekizinji nesliň LCD displeýleriniň önümçiliginiň üstümizdäki ýylyň dördünji çärýeginde tamamlanjakdygy bellenilip geçilýär. Häzirki wagtda Samsung-yň LCD-monitorlaryny Hytaýda iki fabrika we Koreýada-da iki fabrika öndürýär.
Öň, 18-nji martda kompaniýanyň wekilleri 2025-nji ýyla çenli kwant nokatly (QD) telewizorlaryň önümçiligine we olaryň ösdürilmegine 13 trln won (~$10,6 mlrd) maýa goýulmalydygyny habar berdiler.
Kwant nokatlary – bu toguň ýa-da çyranyň täsiri astynda ýalpyldaýan kristallar. Käbir derňewçiler kwant nokatly displeýleriň LCD displeýleri bilen deňeşdirilende bäş esse energiýany az sarp edýändigini, OLED displeýleri bilen deňeşdirilende köp wagtlap hyzmat edýändigini belleýärler. Kwant nokatlarynyň tehnologiýasy Samsung we Nanoco britan kompaniýasy bilen bilelikde işlenilip düzüldi. Britan kompaniýasy 2020-nji ýylyň fewralynda Samsung kompaniýasyny tehnologiýany hyzmatdaşyna hiç hili duýdurmazdan kompaniýanyň öz telewizorlarynda ulanmagynda aýyplap, ony kazyýete berdi.