Şu gün Türkmenistanyň Senagatçylar we telekeçiler birleşmesiniň binasynda TSTB-niň döredilmeginiň 12 ýyllygyna bagyşlanan maslahat geçirildi. Maslahata gatnaşan telekeçiler Aleksandr Dadaýewi Birleşigiň başlygy wezipesine gaýtadan saýladylar, diýip Arzuw News habar berýär. Şeýlelikde, A.Dadaýew 2024-nji ýyla çenli TSTB başlyklyk eder.
Maslahatda şeýle hem TSTB-niň müdirliginiň agzalary saýlanyldy. Bu saýlawlar her dört ýyldan geçirilýär. Maslahata gatnaşyjylar biragyzdan 9 sany dalaşgäri saýladylar.
Ýerli işewür ulgamyň ösüşi bilen bagly meseleler maslahatyň esasy mowzugy boldy. Gün tertibine eksport mümkinçiliklerini artdyrmak üçin önümçilikde täze tehnologiýalaryň gazananlaryny peýdalanmagyň mümkinçiliklerini ara alyp maslahatlaşmaklyk girizildi.
TSTB-niň bilermenleri telekeçiler ýyllyk hasabat bilen tanyşdyrdylar. Hasabata laýyklykda, 2019-njy ýylyň 1-nji martyndan 2020-nji ýylyň 1-nji marty aralykda 1809 sany telekeçi Birleşigiň agzalygyna kabul edildi. Bu günki gün olaryň jemi sany 24 200-e ýetdi.
Maslahatyň barşynda TSTB-de birnäçe ýyllaryň dowamynda zähmet çeken zenanlara ýadygärlik sowgatlar gowşuryldy.
Aleksandr Dadaýew TSTB-niň başlygy wezipesine gaýtadan saýlandy
- 17.03.2020 21:20
- 9.9k+
