“Formula-1” dünýäniň iň baý kompaniýasy bilen şertnama baglaşdy

Dünýäniň iri nebit-gaz kompaniýasy Saudi Aramco “Formula-1” çempionaty bilen şertnama baglaşdy, bu barada autosport.com.ru habar berýär.
Kompaniýanyň “Formula-1”-e maýa goýumynyň bahasy habar edilenok. Indi Saudi Aramco-nyň logotipleri çempionatyň awtodromlarynyň köpüsinde we telegepleşikleriň grafiginde görkeziler. Mundan başga-da, kompaniýa üç Gran-priniň titul hemaýatkäri bolar: ABŞ, Wengriýa we Ispaniýa.
“Biz Saudi Aramco kompaniýasyny “Formula-1”-iň maşgalasynda uly şatlyk bilen garşy alýarys. Onuň bilen tejribe paýlaşmak we tehnologik innowasiýalaryň çäginde işe başlamak mümkinçiligine sabyrsyzlyk bilen garaşýarys. Olaryň ýangyç-energetika gurşawyndaky mümkinçilikleri we tejribeleri bize peýda getirer” – diýip, F1-iň baş müdiri Çeýz Kerri belleýär.
Saudi Aramco “Formula-1”-iň altynjy hemaýatkäri boldy. Çempionatyň ilkinji bäş hemaýatkäri şulardan ybarat – DHL eltip bermäniň nemes hyzmaty, Birleşen Arap Emirliginiň Emirates awiakompaniýasy, Gollandiýanyň Heineken piwo kärhanasy, Italiýanyň Pirelli öndürijisi, Şweýsariýanyň Rolex el sagatlaryny öndürijisi.
Saudi Aramco nebit kompaniýasy doly diýen ýaly Saud Arabystanyň patyşa maşgalasyna degişli. Bu dünýäde nebit alýan iri kompaniýalaryň arasynda iň uly girdejili kompaniýa. 2020-nji ýyl boýunça kompaniýanyň dolanyşygy $712 mlrd-a barabar, onuň üstünligi $1,346 trln bilen bahalandyrylýar, kompaniýanyň bazar kapitallaşdyrmasy Microsoft we Facebook kompaniýalaryny bile alanyňdan hem ýokary bolup, ol $2 trln-a ýetýär.