Audi Hytaýda awtomobil önümçiligini gaýtadan dikeltdi

Audi nemes awtomobil öndüriji kompaniýasy koronawirus ýaýramagy zerarly işini wagtlaýyn togtadandan soňra, Hytaýyň Çançun şäherindäki zawodynda awtomobilleriniň önümçiligini gaýtadan dikeltdi. Bu barada sişenbe güni Automobilwoche hepdelik neşiri habar berýär, diýip Trend agentligi TASS-a salgylanyp belleýär.
«17-nji fewralda biz işimizi dikeltdik we ýagdaýlaryň ýaýbaňlanyşyny gündelik gözegçilikde saklaýarys» - diýip, neşir marketing bölüminiň başlygy Hildegard Wortmanyň sözlerini getirýär. Ol şeýle hem koronawirus ýaýrawy bilen bagly krizisiň heniz «gutarmandygyny» belledi.
Duşenbe güni Uhan welaýatyndaky «Leýşenşan» ýöriteleşdirilen hassahanasynyň baş lukmany Wan Sinhuan koronawirusyň ýaýrawynyň Hytaýda eýýäm iň ýokary derejesine ýetendigini, bu kesel bilen kesellänleriň sanynyň barha azalýanlygyny belledi. Hytaý hökümetiniň berýän maglumatlaryna görä, bu keselden saplanýanlaryň sany depginli artýar: eger-de, 14-nji fewralda 6,7 müň adamyň bu keselden üstün çykandygy habar berlen bolsa, onda 18-nji fewralda irden bu san 12,5 adama ýetdi. Şunuň netijesinde ýapon awtokonsernleri duşenbe güni Hytaýdaky zawodlarynyň işini dikeltmek kararyna geldiler. Netijede, Toyota Çançun we Guançžou şäherlerindäki, Mazda bolsa Nankindäki kärhanalaryny işe girizdi.