Apple $22,2 mlrd gazanmak bilen rekordy täzeledi

Apple kompaniýasy 2020-nji ýylyň birinji maliýe çärýegi boýunça maliýe hasabatyny neşir etdi, bu bolsa 2019-njy ýylyň dördünji çärýegine deň gelýär.
Bu döwür boýunça umumy girdeji $91,8 mlrd-a, arassa girdeji bolsa $22,2 mlrd-a barabar boldy. 2020-nji ýylyň birinji maliýe çärýegi Apple kompaniýasynyň tutuş taryhynyň dowamynda iň girdejili döwür boldy, şeýlelik bilen, Apple 2018-nji ýylyň degişli döwründe goýlan rekordy täzeledi.
Apple-iň ýolbaşçysy Tim Kukuň aýtmagyna görä, iPhone 11 we 11 Pro, dakylýan gurluşlar we serwisler has köp girdeji getirdiler.
«Biz iPhone 11 we iPhone 11 Pro modellerimize bildirilen uly islegiň, şeýle-de, biznes serwisleriniň we dakylýan gurluşlaryň rekordly görkezijileriniň esasynda Apple kompaniýasynyň tutuş taryhynyň dowamynda çärýek boýunça iň ýokary girdejisi barada habar berýändigimize begenýäris. Işjeň enjamlaryň möçberi biziň her bir geografiki segmentlerimizde artdy we häzir 1,5 milliard rekord görkezijisine ýetýär. Biz muňa biziň müşderilerimiziň gyzyklanmasyna, kanagatlanmasyna we ygrarlygyna degerli şaýatnama hökmünde garaýarys, bu bolsa biziň ählitaraplaýyn ösmegimize sebäp bolup hyzmat edýär».
Apple satylan gurluşlaryň sanyny neşir etmeýär, ýöne olaryň girdejisini habar berýär.
-iPhone: $56 mlrd
-iPad: $5,9 mlrd
-Mac: $7,2 mlrd
-Aksessuarlar, dakylýan we öý enjamlary: $10 mlrd
-Serwisler: $12,7 mlrd
2020-nji ýylyň ikinji maliýe çärýeginde Apple girdejiniň $63-67 mlrd möçberde bolmagyna garaşýar.