Space X kompaniýasy orbita 60 sany internet-emeli hemrasyny çykardy

Ilon Maskyň kompaniýasy Starlink ulgamly bütindünýä ýapyk-internet toruny ösdürmegi dowam etdirýär. Space X orbita toparçasy eýýäm 180 sany kosmiki enjamy öz içine alýar. 
Kosmiki tehnikalary öndürmek boýunça Space X amerikan kompaniýasy Starlink ulgamly bütindünýä ýapyk-internet toruny ösdürmek taslamasynyň çäklerinde Ýere ýakyn aşaky orbita ýene 60 sany mini-emeli hemralaryny üstünlikli çykardy. Emeli hemralar iki basgançakly raketa göteriji Falcon 9-yň kömegi bilen ýanwar aýynyň 7-sine Florida ştatynyň Kanaweral burnundaky kosmiki duralgadan orbita çykaryldy. 
Falcon 9-yň eýýäm dördünji gezek ulanylýan köpgezeklik birinji basgançagy uçuşyň bat berlen wagtyndan sekiz ýarym minutdan soňra Atlantik ummanynda Günorta Karolina ştatynyň kenarynda «Of Course I Still Love You» ýüzýän platformasyna awtomatiki usulda gonuş etdi.
60 sany Starlink internet-hemralary 290 km ýokardaky orbita çykaryldy. Space X-iň inženerleri tarapyndan olaryň işe ukyplylygy barlanylandan soňra, enjamlar hususy ion hereketlendirijileri arkaly has belentdäki orbita galarlar. Bu eýýäm Starlink taslamasynyň çägindäki internet-hemralarynyň orbita üçünji gezek çykarylyşydyr. Ilkinji 60 sany enjam maý aýynyň aýagynda, ikinjisi bolsa noýabr aýynda uçurylypdy. Şeýlelikde, orbitada häzir 180 sany Starlink internet-hemralary bar. 
Space X Ýer ýüzüniň islendik nokadynyň ýaşaýjylaryny giň zolakly internet bilen  üpjün etjek bütindünýä toruny döretmek üçin orbita toparçasyndaky ýokarda agzalan görnüşdäki kosmiki enjamlaryny 12 müňe çenli köpeltmegi meýilleşdirýär. Taslamany amala aşyrmak üçin gönükdiriljek maýa goýumlaryň umumy möçberi 10 mlrd amerikan dollary bilen bahalandyrylýar.