Aşgabatda «Ýylyň ýaşlar kompaniýasy» bäsleşigi geçirildi

Şu ýylyň 16-20-nji dekabry aralygynda geçirilen Sanly ykdysadyýet, telekeçilik we innowasiýalar hepdeliginiň çäklerinde birnäçe çäreler gurnaldy. Şolaryň hatarynda 18-19-njy dekabrda «2019-njy ýylyň ýalar kompaniýasy» bäsleşigi geçirildi, diýip Arzuw.news habar berýär.
Bu bäsleşigiň birinji tapgyrynda 18-nji dekabrda 12 sany ýaşlar toparlary öz biznes-kompaniýalarynyň modellerini emin agzalaryna — telekeçili we bilim ulgamynyň, jemgyýetçilik guramalarynyň wekillerine tanyşdyrdylar. Ertesi gün «Ak Altyn» myhmanhanasynyň dabaralar zalynda bäsleşigiň ikinji – jemleýji tapgyry — Ýaşlar kompaniýalarynyň önümleriniň ýarmarkasy gurnaldy.
Toparlar tarapyndan hödürlenilen önümler dürli-dürlüligi, innowasion çemeleşilenligi, ýerli materiallaryň ulanylmagy, gaýtadan ulanylmaga ukyplylygy we ekologiýalylygy bilen tapawutlandy. Toparlaryň ählisi hem ykdysadyýetiň we biznesiň esaslary boýunça bilimlidiklerini, telekeçilik başarnyklaryna, sanly ulgamdan sowatlylyga eýedigini görkezdiler.
Emin agzalarynyň ses bermegi netijesinde «Iň gowy biznes-ideýa», «Innowasion çemeleşme», «Iň gowy biznes-prezentasiýa», «Iň gowy biznes-meýilnama», «Sanly marketing», «Iň gowy söwda tehnikasy» we «Söwda ýeriň iň gowy bezegi» ýaly ugurlar boýunça ýeňijiler kesgitlenildi. Şeýle hem «Ýaş telekeçileriň saýlany» ugry boýunça ýeňijileri kesgitlemek üçin onlaýn-ses berlişik geçirildi.
Ses berlişigiň netijeleri boýunça birinji orny Aşgabat şäheriniň mehanika-tehnologiýa orta hünär mekdebine wekilçilik edýän «Ynamdar ýoldaş» topar eýeledi. «Ynamdar ýoldaş» topary dolulygyna ekologiýa taýdan arassa pagta kagyzyndan taýýarlanylýan torbalary hödürlediler.
Sanly ykdysadyýet, telekeçilik we innowasiýalar hepdeliginiň esasy guramaçylary bolup ABŞ-nyň halkara ösüş boýunça agentliginiň «Üstünlikli geljek üçin ýaşlaryň ösüşine goldaw bermek» taslamasynyň (USAID) goldawy bilen «Türkmenistanyň Ykdysatçylar birleşmesi» çykyş etdi.