«Rysgal» PTB internet-banking ulgamyny işe girizýär

«Rysgal» paýdarlar-täjirçilik banky telekeçiler we hususy taraplar üçin Türkmenistanda ilkinjileriň hatarynda uzak aralykdan bank hyzmaty ulgamyny (başgaça, internet-banking) ornaşdyrýar. Bu barada Orient habar berýär. Täze bank hyzmatynyň tanyşdyrylyşy Türkmenistanyň Senagatçylar we telekeçiler birleşmesiniň binasynda geçdi.
Bu ulgam fiziki we ýuridiki şahslara öýden ýa-da edaradan daşyna çykman, 24 sagadyň dowamynda bank hasabyndaky pul serişdelerini dolandyrmaga mümkinçilik berýär. Bu hyzmat diňe bir çykdajylary azaldyp, wagty tygşytlamak bilen çäklenmän, eýsem, amala aşyrylýan operasiýalaryň howpsuzlygyny üpjün eder, bank bilen müşderiniň arasyndaky gatnaşygy has netijeli eder, şeýle hem hödürlenilýän bank hyzmatlarynyň hilini ýokarlandyrar.
Türkmenistanyň Senagatçylar we telekeçiler birleşiginiň başlygy Aleksandr Dadaýew tanyşdyrylyş dabarasynda eden çykyşynda bu hyzmatyň ýola goýulmagynyň Türkmenistanyň bütindünýä bank ulgamyna goşulmagynda ägirt uly ädimdigini nygtady.
— Bu hyzmaty meniň özüm hem eýýäm ulanyp gördüm. Ynanaýyň, bu diýseň oňaýly – diýip, ol çykyşynda belledi.
Hasabyňdaky serişdeleriň dolanyşygyny görmekden başga-da, internet—banking hyzmaty serişdeleriňi dolandyrmak we internete mümkinçiligi bolan islendik enjamdan hasaplaşyk amallaryny ýerine ýetirmek ýaly amatlyklara hem eýedir. Islendik amal ýerine ýetirilende telekeçiniň telefonyna tassyklamak üçin kod belgili SMS gelýär.
Täze ýyldan başlap islendik adam bu hyzmaty birikdirip biler.