Türkmenistanda ilkinji gezek «Suşi taýýarlaýanlaryň bäsleşigi» geçiriler

Ýaponiýanyň Türkmenistandaky ilçihanasy «Dostawka.bar» onlaýn-platformasy bilen bilelikde isleg bildirýänleriň ählisini Türkmenistanda ilkinji geçek geçirilýän «Suşi taýýarlaýanlaryň bäsleşigine» gatnaşmaga çagyrýar. Bu barada Orient habar berýär.
Aşpezlik bäsleşiginiň maksady — türkmenistanlylary ýapon medeniýeti we Günüň dogýan ýurdunyň milli aşhanasy bilen has ýakyndan tanyşmagyna ýardam etmek bolup durýar.
Balykdan, deňiz önümlerinden we tüwüden taýýarlanylýan tagam Ýaponiýanyň gastronomik tanyşdyryjysydyr. Olary taýýarlamak — giden bir ylym, çünki diňe onuň tehnologiýasyny bilmek we zerur bolan gurallara eýelik etmek ýeterlik däl, eýsem, ony gözel görnüşde berip bilmek hem zerurdyr.
Bäsleşik birnäçe tapgyrda geçiriler. Birinji tapgyrda gatnaşyjylar su-şeflige attestasiýadan geçerler. Olara ýörite gollanma berler, ol özleşdirilenden soňra ýörite test barlagy geçiriler. Netijede iň güýçlilerden 8-si ikinji tapgyra geçer. Bu ýerde olar ýapon tagamlaryny taýýarlamakda ussatlyklaryny görkezerler.
Ýörite meýdançada bäsleşige gatnaşyjylar tizlik babatda suşi, rollary we saşimileri taýýarlamakda, üstesine dürli stillerde taýýarlamakda ýaryşarlar.
Tizlik — bu tagamlary taýýarlamakda möhüm şertdir. Myhmanlar ter tagamdan dadyp, onuň lezzetini alyp bilmeli. Tizlikden başga-da, gatnaşyjylar tagam taýýarlamak işiniň gurnalyşyna we işiň arassalygyna, taýýarlanylyşyň hiline we tagamyň hödür edilişine, onuň tagam aýratynlyklaryna görä bahalandyrylar. Her punkty üçin gatnaşyjy 20 bal alar. Ýaponiýanyň Türkmenistandaky ilçihanasynyň baş aşpezi goşmaça bal berer. Iň köp bal toplan adam «Suşi taýýarlaýanlaryň bäsleşiginde» ýeňiş gazanar.
Geljekde bu hili bäsleşigi yzygiderli esasda geçirmek meýilleşdirilýär.
«Suşi taýýarlaýanlaryň bäsleşigine» gatnaşmaga isleg bildirýänler 10-njy oktýabra çenli resminamalaryny tabşyrmaly. Goşmaça maglumaty bäsleşigi gurnaýjylaryň saýtyndan görüp bilersiňiz.