2022-nji ýylyň fewral aýynda Awstriýada inflýasiýanyň derejesi 5,9%-e çenli ýokarlanyp, 1984-nji ýyldan bäri iň ýokary derejä ýetdi. Bu barada Awstriýanyň Statistik Austria federal statistika edarasy habar berdi.
“2022-nji ýylyň fewral aýynda Awstriýada inflýasiýa 5,9% bolup, 1984-nji ýylyň awgust aýyndan bäri iň ýokary görkezijä ýetdi. Şol wagt inflýasiýanyň derejesi 6% bolupdy. Muňa ýangyjyň we elektrik energiýasynyň bahalarynyň ýokarlanmagy täsir etdi. Bu ugurda bahalar ýokarlanmadyk bolsa, inflýasiýanyň derejesi 3,8%-e deň bolardy” – diýlip, statistika edarasynyň baş direktory Tobias Tomasyň beýannamasynda aýdylýar.
TASS-yň habarçysynyň syn etmegine görä, Awstriýada awtomobiller üçin ýangyjyň bahasy fewral aýynyň ahyryndan mart aýynyň ortalaryna çenli ortaça 50 sent ýokarlandy we häzirki wagtda ýangyç guýujy stansiýalarda 2 ýewrodan gowrak. Benziniň adaty bahasy 2022-nji ýylyň fewral aýyna çenli, takmynan, 1,3 ýewrodan geçmedi.
