14-nji aprelde Wenada (Awstriýa) türkmen wekiliýeti Migrasiýa syýasatyny ösdürmek boýunça halkara merkeziniň (ICMPD) baş direktory Sýuzanna Raab bilen duşuşyk geçirdi.
Gepleşikler 17-nji aprele çenli dowam edýän Serhet howpsuzlygy boýunça bütindünýä kongresiniň çäklerinde amala aşyryldy. Türkmenistanyň wekiliýetine Döwlet migrasiýa gullugynyň başlygynyň orunbasary Sahy Imamberdiýew ýolbaşçylyk etdi.
Taraplar migrasiýany dolandyrmak we serhet howpsuzlygy ulgamynda hyzmatdaşlygy ösdürmäge gyzyklanma bildirýändiklerini tassyklady. Duşuşykda serhetleri toplumlaýyn dolandyrmak, ulgamlary sanlylaşdyrmak we migrasiýa syýasatyny ösdürmek ýaly ileri tutulýan ugurlar maslahatlaşyldy.
Merkezi Aziýada serhetleri dolandyrmak boýunça maksatnamanyň durmuşa geçirilmegine hem-de Türkmenistanyň sebitleýin gepleşiklere — Praga we Budapeşt proseslerine gatnaşmagyna aýratyn üns berildi. Bilelikdäki okuw maslahatlary, maglumat alyşmak we synag taslamalary arkaly amaly hyzmatdaşlygyň ähmiýeti nygtaldy.
Migrasiýa boýunça maslahat beriş merkezleriniň ICMPD-niň esasy taslamalarynyň biri bolup galýandygy bellenildi.
Duşuşygyň netijeleri boýunça taraplar hyzmatdaşlygy ösdürmek we howpsuz hem-de düzgünleşdirilýän migrasiýa babatynda bilelikdäki başlangyçlary amala aşyrmak baradaky meýillerini tassyklady.
