ABŞ-nyň prezidenti Jo Baýden 2024-nji ýylda ikinji möhlete dalaş etmek isleýär. Bu barada Ak öýüň metbugat sekretary Jen Psaki žurnalistler üçin geçirilen brifingde aýtdy diýip, TASS habar berýär.
Ondan Baýdeniň öz tarapdarlaryna 2024-nji ýylda geçiriljek prezident saýlawlaryna gatnaşjakdygyny aýtmagy bilen bagly KHBS-de ozal peýda bolan habara teswir bermek soraldy. “Hawa, bu onuň niýeti” – diýip, Psaki tassyklady.
Öň, “The Washington Post” gazeti Baýdeniň we onuň töweregindäki wekilleriň 79 ýaşly amerikan lideriniň 2024-nji ýylda ikinji möhlete dalaş etjekdigine tarapdarlaryny ynandyrýandygyny habar berdi. Bu synanyşyk köp demokratlaryň Baýdeniň ýaşyny göz öňünde tutup (ses berişlige çenli ol 81 ýaşynda bolar), onuň indiki saýlawlara gatnaşmajakdygyny çak etmekleri bilen baglanyşykly alnyp barylýar. Başga bir tarap, meşhurlyk reýtinginiň pese düşmegi bilen baglanyşyklydyr. Häzirki wagtda Baýdeniň prezident wezipesindäki işini, pikir soraşmalara laýyklykda, ýurduň ýaşaýjylarynyň, takmynan, 40%-i goldaýar.
Baýdeniň prezident wezipesi üçin göreşe gatnaşjakdygy baradaky kararyny Kongrese aralyk saýlawlardan soň resmi taýdan yglan etmegine garaşylýar. Saýlawlar 2022-nji ýylyň noýabr aýynda geçiriler.
