Hytaýyň önümçilik ägirdi Xiaomi awtomobil bazaryna çykmagyň üstünde işleýär. Sentýabr aýynda Xiaomi Automobile Co hasaba alnandan soň, kompaniýa ikinji awtomobil kompaniýasyny hasaba aldy. Bu barada www.ixbt.com habar berýär.
18-nji noýabrda Xiaomi Automobile Technology Co döredildi, oňa Xiaomi-niň esaslandyryjysy we ýerine ýetiriji müdiri Leý Szýun ýolbaşçylyk edýär. Bu kompaniýanyň düzgünnama maýasy 1 mlrd ýuana (takmynan, 155 mln dollar) barabar. Bu kompaniýanyň iş sferasy elektrik ulag serişdeleriniň önümçiligini we degişli tehnologiýalaryň işlenip düzülmegini öz içine alýar.
Xiaomi awtomobil çykarmak meýilnamasy barada şu ýylyň mart aýynyň ahyrynda resmi taýdan yglan etdi. Munuň üçin akylly elektromobiller bilen iş salyşýan golçur kärhana döredildi. Başlangyç maýa goýum, takmynan, 1,5 mlrd dollar boldy, ýöne geljek 10 ýylda kompaniýa, takmynan, 10 mlrd dollar maýa goýar.
Leý Szýun Xiaomi-niň awtomobil döretmek üçin tejribesini we gatnaşyklaryny peýdalanjakdygyny aýtdy. Kompaniýanyň 17 mlrd dollar nagt ätiýaçlygy, şeýle-de 10 000 adamy öz içine alýan gözlegler we işläp düzme bölümi bar. Kompaniýa dünýädäki iň gowy akylly awtomobil ekosistemasyny döretmek üçin bu artykmaçlyklardan peýdalanmagy umyt edýär.
Şu ýylyň oktýabr aýynda Xiaomi 453 adamdan ybarat awtomobil toparyny döredendigini habar berdi. Xiaomi 2024-nji ýylyň birinji ýarymynda resmi taýdan ilkinji awtomobilini köpçülikleýin öndürip başlar.