105 ýaşly amerikaly türgen ylgaw boýunça dünýä rekordyny goýdy

105 ýaşly amerikaly türgen ylgaw boýunça dünýä rekordyny goýdy

“Harasat” (Hurricane) lakamly amerikaly Juliýa Hokins öz ýaş toparynda 100 metr aralyga ylgamakda täze dünýä rekordyny goýdy. Bu barada “USA Today” gazeti habar berýär diýip, lenta.ru belleýär.

105 ýaşly aýal bu aralygy 1 minut 2,95 sekuntda geçdi. Ýaryş 6-njy noýabrda Luiziana ştatynda geçirildi. “Sen näçe ulaldygyňça, şonça-da güýmenjäň köp bolmaly... Işjeň hereketde bolmak – bu meniň esasy hobbilerimiň biri” – diýip, türgen gazete gürrüň berdi.

Ylgaw ýaryşy Hokinsiň Ponçatauladaky çagalyk öýüniň golaýynda geçdi. Hokins şol ýerde orta mekdepde-de sapak beripdi. Garry gatnaşyjynyň öňki okuwçylarynyň käbiri ony goldamak üçin ýaryşa geldi. Hokins 2022-nji ýylyň maý aýynda geçiriljek Fort-Loderdeýldäki Milli oýunlara gatnaşmaga çagyryldy. Ýöne “Harasat” heniz gutarnykly jogaby bermedi.

Hokins ylgaw boýunça ýaryşlara 100 ýaşynda gatnaşyp başlady. Ondan öň ol welosiped sürmek bilen meşgullandy.  Ol 2017-nji ýylda 100-104 ýaş toparynda dünýä rekordyny goýdy, şonda 100 metr aralygy 40,12 sekuntda geçdi. 2019-njy ýylda ol 100 metr aralygy 46,07 sekuntda geçdi. Türgeniň aýdyşy ýaly, ol her gün ylgamaýar, ýöne işjeň hereketde bolup, her gün bir mil aralygy (1,6 kilometr) geçmäge çalyşýar.