“Mona Lizanyň” takyk nusgasy Fransiýada auksiona çykaryldy

“Mona Lizanyň” takyk nusgasy Fransiýada auksiona çykaryldy

Asyl nusgasy italiýaly suratkeş Leonardo da Winçi tarapyndan çekilen we häzirki wagtda Luwrda saklanýan meşhur “Mona Liza” suratynyň takyk nusgasy 9-njy noýabrda Pariždäki Artcurial auksionynda satylar. Bu barada TASS habar berýär.

“Artcurial “Mona Lizanyň” aýratyn nusgasyny hödürleýär” – diýlip, fransuz auksion öýüniň saýtynda ýerleşdirilen habarda aýdylýar. Onda bu nusganyň, takmynan, 1600-nji ýylda çekilendigi we onuň awtorynyň asyl nusga ygtyýarynyň bolandygy, şol sebäpli iki suratyň meňzeşdigi bellenilýär. Suratyň bahasy 173 dollardan 230 müň dollar aralygynda üýtgeýär.

Reuters agentliginiň belleýşi ýaly, da Winçiniň bu eseriniň XVII asyrda döredilen başga bir nusgasy şu ýylyň iýun aýynda Pariždäki Christie’s auksionynda 2,9 mln ýewro satyldy. Italiýaly ussadyň “Dünýäni halas ediji” suraty bolsa auksionlarda satylanlaryň arasynda iň gymmat surat boldy. Onuň asyl nusgasy 2017-nji ýylyň noýabr aýynda Nýu-Ýorkdaky Christie’s auksionynda 450 mln dollara satyldy.

“Mona Liza” dünýädäki iň meşhur surat eserleriniň biridir. Leonardo da Winçi “Mona Lizany” Florensiýada çekýär, ýöne 1516-njy ýylda suraty Fransiýa öz ýany bilen alyp gidýär. 1519-njy ýylda suratkeşiň ölüminden soň portreti Fransiýanyň koroly Fransisk I alýar. Surat Lýudowik XIV-niň döwrüne çenli Fontenblo galasynda saklanýar. Ol suraty Wersal köşgüne getirýär, XVIII asyryň ahyrlarynda fransuz rewolýusiýasyndan soň ol Luwra geçirilýär.