Apple 14 we 16 dýuým ekranly täze MacBook Pro modellerini hödürledi

Apple 14 we 16 dýuým ekranly täze MacBook Pro modellerini hödürledi

Apple amerikan kompaniýasy MacBook Pro flagman noutbugynyň täzelenen modellerini hödürledi. Täze gurluşlaryň tanyşdyrylyş dabarasy kompaniýanyň saýtynda onlaýn görnüşde geçirildi. Bu barada ren.tv habar berýär.

Täze MacBook Pro iki görnüşde – 14 we 16 dýuým diagonally displeýler bilen hödürlendi. Gurluşyň ekranynyň ýokary böleginde iPhone smartfonlarynda we iPad planşetlerinde ulanylýan kameraly blok ýerleşýär. 

Kompaniýanyň noutbuklaryň täze neslinde MacBook Pro-nyň öňki neslinde bolmadyk MagSafe magnit zarýad ulgamyna dolanjakdygy bellenilýär. Şeýle-de, hünärmenler köp funksiýaly sensor paneli Touch Bar-dan ýüz öwürdiler, ol doly ölçegli dolandyryş klawişleri bilen çalşyldy. 

Apple täze noutbuklary hususy önümçiliginiň ýokary derejeli M1 Pro we M1 Max prosessorlary bilen üpjün etdi. Topluma baglylykda täze MacBook Pro 64 gigabaýta çenli operatiw ýada eýe bolar, içerki ýadyň göwrümi 8 terabaýta çenli ýokarlandyrylyp bilner. Öndürijileriň aýtmagyna görä, akkumulýatoryň möçberi wideo görmek režiminde 21 sagada çenli üznüksiz işlemek üçin ýeterlikdir.