Nemes awtoulag öndürijisi bolan “Opel” altynjy nesil “Astra” heçbegini köpçülige tanyşdyrdy. Bu barada kompaniýanyň metbugat gullugyna salgylanyp, vesti.ru habar berdi.
Täze nesil "Opel Astra" heçbegi EMP2 modul platformasynda döredildi. Bu modul platformasy Peugeot 3008, Peugeot 5008 we Citroen C5 Aircross ýaly modeller bilen öňden hem meşhurdyr.
“Opel”-iň täze modeli özüne mahsus bolan stilde “Visor” elementi bilen bezelipdir. “Astra”-nyň esasy görnüşinde “LED optika” oturdyldy. Saýlama modelde bolsa her farada 84 element bolan, jemi 168 LED elementli "Intelli-Lux" matrisasy ornaşdyrylypdyr.
Täze önümiň içki böleginde Nappa nagyşly täze oturgyçlar bar. Şeýle hem onda 10 dýuým duýgur ekranly bitewi Pure Paneli görmek bolýar. Ondaky displeýleriň biri dolandyryş paneli, ikinjisi bolsa multimediýa ulgamy üçin niýetlenendir. Olaryň aşagynda klimat-kontrol düwmeleri-de bar.
Şeýle hem altynjy nesil “Opel Astra” 110 we 130 at güýji bolan 1,2 litrlik benzin turbo hereketlendirijileri bilen ýöreýär diýip, çeşme belleýär.