Ýaponiýanyň «Fugaku» superkompýuteri «dünýädäki iň çalt» adyny tassyklady

Ýaponiýanyň «Fugaku» superkompýuteri «dünýädäki iň çalt» adyny tassyklady

Ýaponiýanyň “Fugaku” superkompýuteri “dünýädäki iň çalt superkompýuter” adyny saklady. Muny “Top-500” halkara taslamasynyň hünärmenleri ýene bir gezek tassykladylar diýip, “Nikkei” gazeti ýazýar. Bu barada TASS belleýär.

“Fugaku” 2020-nji ýylyň iýun aýynda dünýäde iň çalt superkompýuter diýlip yglan edildi. Noýabr aýynda bu status ýene bir gezek tassyklandy. Şol bir wagtyň özünde ABŞ we Hytaý şu ýylyň dowamynda has kuwwatly superkompýuterleri işe girizmegi meýilleşdirýärler we netijede, “Fugaku” dünýädäki iň çalt superkompýuter adyny ýitirip biler.
Şu ýylyň mart aýynda Kobe şäherindäki Ýaponiýanyň döwlet tebigy ylymlar institutynyň hasaplaýyş merkezinde (Riken) bu superkompýuter doly güýjünde işläp başlady. Ol Fujitsu elektronika korporasiýasy tarapyndan Riken hünärmenleri bilen hyzmatdaşlykda döredildi. Superkompýuter sekuntda 415 kwadrilliondan gowrak hasaby amala aşyryp bilýär. Bu sanawda öň birinji orny eýeläp, häzir ikinji orna düşen Ok-Rijdäki ABŞ-nyň Milli barlaghanasynyň Summit superkompýuteriniň tizliginden, takmynan, 2,8 esse ýokarydyr. Üçünji orunda hem amerikan superkompýuteri ýerleşýär, dördünji we bäşinji orunlary Hytaýyň maşynlary eýeleýär.
Häzirki wagtda “Fugaku” pandemiýa, emeli intellekt we howany çaklamak bilen bagly ýüzlerçe barlag işlerine gatnaşýar.
“Fugaku” ýaponlar üçin mukaddes bolan Fudzi dagynyň bir adydyr.