Beýik Britaniýada şa zenany Ýelizaweta II-niň ýoldaşy, 9-njy aprelde aradan çykan Edinburg şazadasy Filippe bagyşlanan nominaly 5 funt sterling bolan teňňe çykaryldy. Bu barada Bi-bi-si salgylanyp, rbc.ru habar berýär.
“Onuň Patyşa Alyhezretleri şazada Filipp, Edinburg gersogy, 1921-2021” diýen ýazgyly teňňe The Royal Mint (Patyşa zikgehanasy) tarapyndan çykarylar.
“Men şazada Filippiň belli harby-deňiz karýerasyny we monarhymyza hem-de şa wezipelerine wepalylygyny nazarda tutup, Ýaragly güýçleriň gününde teňňäni uly buýsanç bilen hödürleýärin” – diýip, Beýik Britaniýanyň maliýe ministri Rişi Sunak aýtdy.
Suratkeş Ýan Renk-Brodli tarapyndan döredilen teňňe kanuny töleg serişdesi bolsa-da, kolleksiýa hökmünde döredildi. Ol çäkli tiraž bilen çykaryldy we dolanyşyga goýberilmez. Bu teňňe The Royal Mint-iň saýtynda, Britaniýanyň patyşa poçtasy bölümlerinde we ýurtdaky hem-de dünýädäki ýöriteleşdirilen dükanlarda elýeterli bolar. Şa däbine laýyklykda, ýadygärlik teňňesiniň nominaly 5 funt sterling bolup, täç geçdirme ýa-da ýubileý wakalaryny bellemek üçin, adatça, hut şu nominal ulanylýar.
Şeýle-de, The Royal Mint Beýik Britaniýada we tutuş dünýäde jemgyýetçilik işini goldamak üçin şazada tarapyndan 1956-njy ýylda esaslandyrylan Edinburg gersogy baýragyna 50 müň funt sterling bagyş eder.
