Türkmen söweşijisi Döwletjan Ýagşymyradow Demirgazyk Irlandiýanyň paýtagtynda şu gün irden geçirilen PFL Belfast ýaryşynda awstraliýaly Taýson Pedrony ýeňmegi başardy.
Tutluşyk üç raund dowam etdi. Birinji raundda Ýagşymyradow has takyk hereket edip, aýak we el urgularyny netijeli ulandy, raundyň ahyrynda bolsa garşydaşyny partere geçirdi. Ikinji tapgyrda ol aýak üstünde ynamly işlemegini dowam etdirdi we takyk garşylykly urgulary indirip, söweşiň gidişini öz elinde saklady. Üçünji raundda Pedro basyşy artdyryp, birnäçe urgular bilen Ýagşymyradowy sarsdyryp bildi. Ýöne türkmen pälwany özüni dürsemegi we söweşi ýene-de partere geçirmegi başaryp, tä söweşiň ahyryna çenli artykmaçlygyny saklady.
Üç raundyň netijesi boýunça eminler 29–28 hasabynda ýeňşi biragyzdan Ýagşymyradowa berdi.
Söweşden soň berlen interwýuda türkmen pälwanyndan: «Iň soňky raundda näme boldy? Hemme zat tamamlanan ýalydy. Sen şol ýerde saklanan ýaly göründiň. Bu gaty töwekgelçilikli boldumy?» – diýip soradylar.
Döwletjan bolsa: «Ol [Pedro] güýçli we ýokary derejeli garşydaş. Käwagt ähli zady ýekeje urgy çözüp bilýär. Mümkin, şol urgy meni seňseledendir» diýip jogap berdi.
Indi kim bilen duşuşmak isleýändigi baradaky soraga bolsa ýeňiji şeýle jogap berdi: «Men islendik adam bilen duşuşmaga taýýar. Islendik söweşiji bilen, dost, islendik. Men belli biriniň adyny tutjak däl. Guramaçylar maňa kimi berseler — men elmydama taýýar... Eger maňa "Döwlet, iki hepdeden söweşiň bar" diýseler, men "bolýar, mesele ýok" diýerin. Söweş — meniň ömrüm. Men tutluşygy gowy görýärin» diýdi. Şondan soňra ol özüni goldanlaryň hemmesine, şeýle hem öz ýurduna we döwlet Baştutanyna minnetdarlyk bildirdi.
Agşamyň esasy söweşinde täze zelandiýaly Jeý Jeý Uilson birinji raundyň 37-nji sekuntynda çep eliniň takyk urgusy bilen irlandiýaly Darrag Kellini nokauta düşürdi.
Esasy tutluşykdan öňki duşuşykda bolsa Demirgazyk Irlandiýanyň wekili Ris Makki eminleriň biragyzdan beren çözgüdi bilen Aleks Lohoreni ýeňdi – 30-27.
