Rio-de-Žaneýro şäherinde ýetginjekleriň we kadetleriň arasynda geçirilýän gylyçlaşmak boýunça dünýä çempionaty wagtynda ýangyn ýüze çykdy. Netijede, olimpiýa welodromynyň üçegi doly ýanyp, weýran boldy. Bu barada Bi-bi-si habar berýär.
Ýaryşlar 1-nji aprelden bäri dowam edýär. Ýangyn sebäpli çempionatyň iň soňky gününiň maksatnamasyny başga bir arena geçirmeli boldular.
Ýangyny söndürmäge 80 sany ýangyn söndüriji we 20 sany ýörite tehnika gatnaşdy.
Ot bilen göreş takmynan 14 sagat dowam etdi we ahyrsoňy doly öçürildi.
Rio-de-Žaneýro şäheriniň häkiminiň aýtmagyna görä, arenanyň içindäki welotrege zeper ýetmedi.
