Braziliýa gyşky Olimpiýa oýunlarynda medal gazanan ilkinji Günorta Amerika ýurdy boldy. Milano we Kortina-d’Ampessoda geçýän ýaryşlarda gigant slalom boýunça altyn medal gazanan braziliýaly dag lyžaçysy Lukas Pinýeýro Broten bu taryhy üstünligiň eýesi boldy.
Iki synanyşygyň netijesinde Broten 2 minut 25 sekuntlyk umumy wagty görkezdi. Ikinji we üçünji orunlary Şweýsariýanyň wekilleri Marko Odermatt we Loik Meýar eýelediler.
25 ýaşly Broten aslynda Norwegiýada doguldy we 2023-nji ýyla çenli şol ýurduň adyndan çykyş edýärdi. Şol döwürde türgen Dünýä kubogynyň ýaryşlarynda bäş gezek ýeňiş gazandy we slalom boýunça umumy hasapda ýeňiji boldy. Soňra türgenleriň marketing hukuklary babatdaky berk düzgünler sebäpli, onuň bilen Norwegiýanyň federasiýasynyň arasynda düşünişmezlik ýüze çykdy.
Ondan soň Broten sport ýoluny tamamlaýandygyny yglan etdi, emma 2024-nji ýylda ýene-de uly sporta gaýdyp gelip, Braziliýanyň ýygyndysynda çykyş edip başlady. 2025-nji ýylyň noýabr aýynda ol ýurt üçin taryhda ilkinji gezek Dünýä kubogynyň altyn medalyny gazandy.
