Italiýaly tälimçi Karlo Ançelotti Braziliýanyň futbol boýunça milli ýygyndysy bilen şertnamasyny 2030-njy ýyla çenli uzaltdy. Bu barada Braziliýanyň Futbol konfederasiýasynyň metbugat gullugy habar berýär.
66 ýaşly hünärmen bilen baglaşylan öňki ylalaşyk 2026-njy ýylyň dünýä çempionatynyň ahyryna çenli niýetlenipdi.
Italiýaly hünärmen 2025-nji ýylyň tomsunda Braziliýanyň ýygyndysynyň ýolbaşçylygyna geçdi. Onuň tälimçilik etmeginde topar ABŞ-da, Meksikada we Kanadada geçiriljek dünýä çempionatyna gatnaşmaga hukuk gazandy. Toparlaýyn tapgyrda braziliýalylar Marokkonyň, Gaitiniň we Şotlandiýanyň ýygyndylary bilen oýnar. Tälimçiniň mundan öňki iş ýeri Ispaniýanyň «Real Madrid» kluby bolupdy.
Ançelotti taryhda Ýewropanyň iň güýçli bäş milli çempionatynyň her birinde ýeňiji bolan ilkinji tälimçidir. Şeýle-de, italiýaly hünärmen tälimçi hökmünde Çempionlar ligasynda gazanan ýeňişleriniň sany boýunça rekord eýesi — ol öz toparlaryny bäş gezek çempionlyga ýetirdi.
Ançelotti Ýewropa futbol assosiasiýalarynyň birleşiginiň (2022) we Halkara futbol federasiýasynyň (2024) wersiýalary boýunça ýylyň tälimçisi diýlip ykrar edildi. Şeýle hem, hünärmen Italiýanyň çempionatynyň (2001, 2004) we Fransiýanyň çempionatynyň (2013) netijeleri boýunça bu baýraga mynasyp bolupdy. Ançelotti italýan futbolynyň, «Milanyň» we «Romanyň» şöhrat zallaryna girizildi.
