Dünýäniň iň baý adamy diýen ady gysga wagtlyk Amazon kompaniýasyny esaslandyryjy Jeff Bezosa geçiren SpaceX we Tesla kompaniýalarynyň ýolbaşçysy Ilon Mask milliarderleriň sanawynda ýene-de birinji orna gaýdyp geldi diýip, Bloomberg agentligi habar berýär. Muny RIA Nowosti ýetirýär.
Agentligiň maglumatlaryna görä, Maskyň baýlygy häzirki wagtda 199,9 mlrd dollara ýetýär. Muňa SpaceX-iň gymmatly kagyzlaryny ýerleşdirmegiň nobatdaky tapgyry täsir etdi, ýagny onuň jemi boýunça kompaniýa 850 mln dollar girdeji gazandy, onuň umumy bahasy bolsa, takmynan, 74 mlrd dollara çenli ýokarlandy. Bezosyň hasabynda 194,2 mlrd dollar bar.
Bezos 2017-nji ýyldan 2021-nji ýylyň 7-nji ýanwaryna çenli dünýäniň iň baý adamy hasaplanyldy, şonda ilkinji gezek Mask ondan öňe geçipdi. Şu hepde Amazon-yň esaslandyryjysy Tesla paýnamalarynyň bahasy pese gaçandan soň, biraz wagtlyk sanawyň birinji ornuna dolanyp geldi.
Agentlik tarapyndan düzülýän dünýäniň iň baý adamlarynyň sanawy ABŞ-da gazna söwdalarynyň jemi boýunça her gün täzelenýär.
