Angliýanyň banky 50 ýyldan gowrak wagtdan bäri ilkinji gezek banknotlaryň dizaýn konsepsiýasyny üýtgetmegi meýilleşdirýär. The Telegraph gazetiniň habar bermegine görä, Beýik Britaniýanyň ozalky premýer-ministri Winston Çerçilliň, ýazyjy Jeýn Ostiniň, şeýle-de britan matematigi we logik Alan Týuringiň şekilleri ýabany tebigatyň jandarlary bilen çalşylar.
Bu çözgüt 44 müň adamyň gatnaşmagynda geçirilen jemgyýetçilik barlagyndan soň kabul edildi. Gatnaşyjylaryň 60 göterim töweregi tebigat şekilleriniň bolmagyny goldady, taryhy şahsyýetleriň keşbi bolsa sesleriň 38 göterimini aldylar.
Neşirde Angliýa bankynyň geňeşmeleriň netijeleri yglan edilmänkä, Savanta kompaniýasyndan barlag geçirmegi sargyt edendigi aýdylýar. Hasabatda Winston Çerçill, Jeýn Ostin we Alan Týuringiň «jedelli şahsyýetler hökmünde kabul edilip bilinjekdigi we ýurduň häzirki medeni dürlüligini doly şöhlelendirmeýändigi» bellenipdir. Şunlukda derňewçiler ünsi tebigata gönükdirmegi maslahat beripdirler.
Bank dizaýny üýtgetmek baradaky kararyň Savanta-nyň hasabatyna däl-de, jemgyýetçilik barlagynyň netijelerine esaslanyp kabul edilendigini nygtaýar. Kadalaşdyryjy edaranyň ýolbaşçysy Endrýu Beýli dizaýny täzelemegiň esasy maksatlarynyň biriniň banknotlary galp puldan goramagy güýçlendirmekdigini belledi.
Şol bir wagtda meýilnamalar birnäçe britan syýasatçylarynyň tankydyna-da sezewar boldy. Konserwatiw partiýanyň we «Beýik Britaniýanyň reformasy» partiýasynyň wekilleri kadalaşdyryjy edarany ýurduň taryhy mirasyny gaýtadan gözden geçirmäge milt etmekde aýypladylar.
Indi britanlar täze banknotlar üçin ýerli faunanyň 18 görnüşinden haýwanlary saýlamaly bolarlar. Kandidatlaryň arasynda: mele tilki, afalina (delfiniň bir görnüşi), tupik (demirgazyk deňiz guşy) we adaty gurbaga bar.
Britan banknotlarynda taryhy şahsyýetleri şekillendirmek däbi 50 ýyldan bäri dowam edip gelýär. Ilkinji gezek 1970-nji ýylda 20 funtluk kagyz pulda Wilýam Şekspir peýda boldy. Häzirki wagtda Çerçill 5 funtluk, Ostin 10 funtluk, nakgaş Wilýam Terner 20 funtluk, Týuring bolsa 50 funtluk banknotlary bezeýär.
