Nissan kompaniýasy 2007-nji ýyldan bäri bazarda görünmeýän Primera modeliniň täze neslini tanyşdyrdy. Awtomobiliň köpçülikleýin premýerasy Filippiniň halkara awtosalonynda (PIMS) boldy.
Täze Primera doly elektrik güýç gurluşyna eýe boldy we ol Hytaýda Nissan bilen Dongfeng-iň bilelikdäki kärhanasy tarapyndan öndürilýän Nissan N7 sedanynyň binýadynda guruldy. Bu täze ulag köne modelden diňe adyndan başga ähli zady bilen doly tapawutlanýar.
Elektromobil 215 at güýjüne we 305 Nm aýlaw pursatyna eýe bolan hereketlendiriji bilen üpjün edildi. Ulagyň ýol ätiýajy 500 kilometre ýetýär. Awtomobil fastbek kuzowynda ýasalyp, gizlin gapy tutawaçlaryna we uzynlygy bilen öň bölegini doly tutýan LED optikasyna eýe boldy. Ölçegleri boýunça bu model Toyota Camry modelinden hem uludyr.
Primera modeliniň taryhy 1990-njy ýylda başlady. Awtomobil 2007-nji ýyla çenli jemi üç nesilde öndürildi we sedan, liftbek hem-de uniwersal kuzow görnüşlerinde hödürlendi. Bu model awtosportda hem uly üstünlikler gazanyp, Britaniýanyň turing-kar çempionatynda birnäçe ýeňişleri alypdy.
Primera EV modeliniň premýerasy Nissan kompaniýasynyň «From China» atly täze eksport strategiýasynyň bir bölegi boldy. Kompaniýa geljekki modelleri işläp taýýarlamagyň we öndürmegiň esasy merkezi hökmünde Hytaýy ulanmagy maksat edinýär.
Täze ulag Günorta-Gündogar Aziýanyň we Ýakyn Gündogaryň bazarlaryna iberiler.
Awtomobiliň resmi bahasy we satuwa çykaryljak wagty häzirlikçe mälim edilmedi.
