Claude emeli aň modelini işläp düzüji Anthropic amerikan kompaniýasy paýnamalaryny ilkinji gezek köpçülige hödürlemek (IPO) boýunça resmi arza ýollady. Bu barada kompaniýanyň özi habar berdi.
Paýnamalary ýerleşdirmegiň anyk möhletleri we şertleri häzirlikçe mälim edilmedi. Anthropic tarapyndan berlen beýanata görä, bu çözgüt «bazaryň ýagdaýyna we başga-da birnäçe şertlere» bagly bolar. «The New York Times» neşiriniň maglumatyna görä, kompaniýanyň birža çykmagy eýýäm şu ýylyň güýzünde bolup biler.
Bu arzanyň tabşyrylmagy Anthropic kompaniýasyna özüniň iň esasy bäsdeşleriniň biri bolan we şeýle hem IPO geçirmegi meýilleşdirýän OpenAI kompaniýasyndan öňürtmäge mümkinçilik berýär. «NBC News» telekanalynyň baha bermegine görä, birža ilkinji bolup çykan kompaniýa täze maýa goýumlary çekmekde goşmaça artykmaçlyklara eýe bolup biler.
Anthropic bäş ýyl mundan ozal OpenAI kompaniýasynyň öňki işgärleri tarapyndan Dario Amodeiniň ýolbaşçylygynda esaslandyryldy. Soňky wagtlarda kompaniýa programmalaşdyrmak üçin niýetlenen Claude Code guralyny işjeň ösdürýär. Kompaniýanyň girdejisi tas bäş esse ýokarlandy — 10 milliard dollardan 47 milliard dollara çenli, onuň umumy bahasy bolsa OpenAI kompaniýasynyň 852 milliard dollarlyk bahasyny yzda galdyryp, 965 milliard dollara ýetdi.
Şeýle-de, häzirki wagtda bahasy bir trillion dollardan geçýän SpaceX kompaniýasynyň hem IPO geçirmegine garaşylýar. Anthropic, OpenAI we SpaceX kompaniýalarynyň birža çykmagy dünýäniň maliýe bazaryndaky iň iri wakalaryň biri bolup biler.
